Jaıyq jaǵasyn bekitý úshin kúnine 12 saǵat jumys isteımin – aýyr júk kranynyń operatory

ATYRAÝ. KAZINFORM – Atyraý oblysynda Jaıyq ózeniniń jaǵasyn bekitý jumysy áli jalǵasyp jatyr.

Oblystyq jedel shtabtyń málimetinshe, ótken táýlikte Atyraý qalasynda jaǵalaýdy bekitý jumystaryna mekemelerden 3875 qyzmetker, 1751 áskerı qyzmetshi men 3741 erikti jumyldy. Bóget salýǵa arnaıy 1028 tehnıka tartylǵan. 

Solardyń qatarynda «Birlik» JShS-niń qyzmetkeri Sáttibaı Dáýletııarov ta bar. Onyń qyzmeti – aýyr júk kranynyń operatory. Ózen jaǵalaýynda kúnine 12 saǵat jumys isteıdi. 

«Qurylys jumystaryna kran óte qajet. Qazir Almaly aýylyndaǵy ózen jaǵalaýyna beton plıta tóselip jatyr. Bul krannyń bir mezette 30 tonna júk kóteredi. Meniń mindetim – kólikpen jetkizilgen plıtalardy túsirip alyp, jaǵalaýǵa tóseý», -deıdi Sáttibaı Dáýletııarov. 

Ol Atyraý qalasyndaǵy Geolog eldi mekeninde turady. Onyń balalary men kúıeý balalary Geolog aýylyndaǵy jaǵa bekitý jumysyna qatysyp júr. Al, ózi Almaly aýylyna jetý úshin tańerteń saǵat 07:00-de úıinen shyǵady. 

«Jumysymdy tańerteńgi saǵat 08:00-de bastaımyn. Sodan keshki saǵat 20:00-ge deıin jumys isteımin. Maqsatymyz – eldi mekenderdi tasqyn sýdan qorǵaý. Ortaq maqsatymyzǵa jetetinimizge senemin», -deıdi Sáttibaı Dáýletııarov. 

Eske sala ketelik, budan buryn Atyraýdaǵy bóget qurylysyna ózge óńirlerden jetkizilgen tehnıkalar tartylǵanyn jazǵan edik. 

Sondaı-aq, úsh myńǵa jýyq sarbaz Jaıyq jaǵalaýynda bóget salyp júr.