Jaıyq ózeniniń Oral qalasy tusyndaǵy deńgeıi 730 santımetrden asty
ORAL. KAZINFORM – Jaıyq ózenindegi sý deńgeıi Oral qalasy tusynda 11 sáýir kúngi saǵat 16.00-degi málimet boıynsha 731 santımetrge (qaýipti shegi – 850 sm) jetti.
«Qazsýshar» RMK Batys Qazaqstan fılıalynan málim etkenindeı, sý tasqyny bastalǵannan beri Jaıyqtyń deńgeıi jalpy 6 metrge kóterildi.
«Reseıdiń Orynbor oblysynda ornalasqan Irıkla sý qoımasynan Jaıyq ózenine sekýndyna 902 tekshe metr sý jiberilip jatyr. Budan buryn Irıkladan sekýndyna 2 170 tekshe metr sý bosatylǵan edi. Qazirgi kezde qoımaǵa quıylatyn sý kólemi azaıýda. Degenmen sáýir aıynyń ekinshi jartysynda Jaıyqtyń iri salasy – Saqmar men Irıkladan Batys Qazaqstan oblysyna mol sý keledi dep boljanyp otyr. Jaıyq ózeninen Jaıyq-Kóshim júıesine sekýndyna 99,9 tekshe metr sý túsýde. Shaǵan sý qoımasyndaǵy sýdyń deńgeıi – 29,51 metr. Shaǵan jáne Derkól ózenderiniń boıyndaǵy gıdrobeketterinde sý deńgeıiniń tómendeýi baıqalady. Fılıaldyń sý sharýashylyǵy nysandarynda jaǵdaı turaqty», - dep habarlady vedomstvodan.
Oral qalasy ákimdigi Jaıyq ózeniniń jaıylmalarynda ornalasqan saıajaılar men baý-baqsha seriktestigin sý basý qaýpi tóngenin habarlap, turǵyndardyń úılerinen shuǵyl ketýi kerektigin taǵy bir eskertti. Jaıylmalardaǵy saıajaılar elektr jáne gazben ajyratylǵan. Saıajaı turǵyndary «Jekpe-jek» sport kesheni (Zachagan kenti, M.Móńkeuly kóshesi, 114) jáne joǵary sport sheberligi mektebindegi (Á.Áıtıev kóshesi, 72) evakýatsııalyq pýnktterge ornalasa alady.
Eske sala keteıik, budan buryn Jaıyq ózeni boıynda uzyndyǵy 40 shaqyrymnan asatyn bógetter turǵyzylyp jatyrǵanyn jazǵan bolatynbyz.
