Jaıyq ózeninen Atyraý mańyndaǵy 5 eldi mekenge qaýip tónýi múmkin

ATYRAÝ. KAZINFORM – Jaıyq ózenindegi sý deńgeıiniń kóterilýine baılanysty Atyraý qalasynyń mańyndaǵy 5 eldi mekenge qaýip tónýi múmkin. 

Atyraý oblysy ákiminiń orynbasary Jasulan Bısembıevtiń aıtýynsha, aldaǵy kúnderi Jaıyq ózenindegi sý deńgeıi eń joǵary shegine jetýi múmkin.

«Atyraý oblysynda sý tasqynynyń qaýpi áli de kúrdeli kúıde qalyp tur. Qazir Jaıyq ózenimen aǵyp keletin tasqyn sýdyń kóp mólsheri Atyraý oblysynyń aýmaǵyna kirdi. Kún saıyn Inder, Mahambet aýdandary men Atyraý qalasyndaǵy gıdrobeketterde sý deńgeıiniń kóterilý kórsetkishi tirkelip otyr. Inder jáne Mahambet aýdanynda sý deńgeıi qaýipti shekten asyp ketti. Biraq, ózen jaǵalaýynda salynǵan bóget eldi mekenderdi sý basý qaýpinen qorǵap tur», - dep habarlady Jasulan Bısembıev.

Ákim orynbasarynyń aıtýyna qaraǵanda, búgin túnde Inder aýdanynda eski qubyr arqyly tasqyn sý eldi meken aýmaǵyna kirgen.

«Inderbor kentinde der kezinde tasqyn sýdy toqtatýǵa qatysty qajetti is-shara qabyldandy. Sonyń nátıjesinde tasqyn sý basý qaýpi seıildi», - dedi Jasulan Bısembıev. 

Al, Atyraý qalasynda Jaıyq ózeniniń jaǵalaýyna 250 shaqyrymnan astam bóget turǵyzylǵan.

«Qazir Atyraý qalasynyń mańyndaǵy Besikti, Almaly, Talǵaırań, Aqjar, Aqsaı eldi mekenderi sý basý qaýpi basym aýmaqta qalyp otyr. Osyǵan baılanysty Jaıyq ózeniniń jaǵalaýynda táýlik boıy kezekshilik uıymdastyryldy», - dep málim etti Jasulan Bısembıev.

Eske sala ketelik, budan buryn Atyraý oblysyndaǵy Taldykól aýylynyń turǵyndaryn evakýatsııalaý bastalǵanyn habarlaǵan edik.

Sondaı-aq, Atyraý - Oral trassasynan Inderborǵa burylatyn 7 shaqyrym joldy tasqyn sý shaıyp ketti.