Jaıyq ózenindegi sý deńgeıi Atyraýdaǵy Inderborda – 10, Mahambette 9 metrden asty

ATYRAÝ. KAZINFORM – Atyraý oblysynda Jaıyq ózenindegi sý deńgeıi taǵy kóterildi. Qazir Inderbor kentinde – 10, Mahambet aýylynda 9 metrden asty.

Atyraý oblysynyń jedel shtabynan málim etkendeı, 9 mamyrda tańerteńgi 08:00-de Jaıyq ózeniniń deńgeıi Indeorbor kentinde 992 sm bolǵan. Al, keshki saǵat 20:00-de 1005 santımetrge jetti. Qazir bul deńgeı qaýipti shekten 160 santımetrge kóbeıgen. 

Mahambet aýdanynda Jaıyq ózenindegi sýdyń kóterilýine baılanysty jaǵalaýdy bekitý jumysy jalǵasyp otyr. Osyndaı jumys Beıbarys aýyldyq okrýgine qaraıtyn Taldykól aýylynda júrgizildi. 

Óıtkeni, bul aýdanda ózen deńgeıi 9 metrden asyp ketti. Búgin, 9 mamyrda tańerteń saǵat 08:00-de Mahambet aýylynyń tusynda 908 santımetrdi quraǵan. Al, keshki saǵat 20:00-de 915 santımetrge jetken.

Sý arnasynyń deńgeıi Atyraý qalasynda keshki saǵat 20:00-de 525 santımetrdi kórsetip tur. Shahar tusynda 550 sm qaýipti shek retinde belgilengen. Jaıyq ózenindegi sý qala mańyndaǵy Jańatalap aýylynda 377, Erkinqala eldi mekeninde 337 santımetr qurady. 

Eske sala ketelik, buǵan deıin Atyraý-Oral trassasynan Inderborǵa burylatyn joldyń eki jaǵyna sý jınalǵanyn jazǵan bolatynbyz. 

Al, búgin Atyraý oblysynda Jaıyq jaıylmasyndaǵy qystaqtyń 30 turǵyny evakýatsııalanatynyn habarlaǵan edik.