Jaýapsyz retsenzentter dıssertatsııalyq keńes jumysynan shettetiledi
Bul týraly Bilim jáne ǵylym mınıstrliginiń apparat májilisinde Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova málim etti.
«Ǵylymı keńesshiler men retsenzentterge doktornattarmen jaýapsyz jumys istegeni úshin jaýapkershilik belgilendi. Eger doktoranttyń jumysy qabyldanbasa, onyń ǵylymı keńesshisi men jaǵymdy pikir jazǵan maman 3-5 jyl boıy dıssertatsııalyq keńestiń jumysyna qatysa almaıdy jáne doktorlyq dıssertatsııalarǵa retsenzııa jaza almaıdy», - dedi Gúlzat Kóbenova.
Komıtet tóraıymy dıssertatsııanyń qorǵaýdyń ashyqtyǵy qalaı qamtamasyz etiletinin de aıtty.
«Bul boıynsha da syn kóp aıtylǵanyn bilesizder. Jarııa túrde qorǵaý rásimi endi mindetti túrde ınternet arqyly tikeleı efırde kórsetiledi. Resmı retsenzentter dıssertatsııalyq keńestiń jumysyna mindetti túrde qatysyp, qupııa daýys berýge qatysýy kerek. Onyń ústine qorǵaýǵa osy salanyń praktıkadaǵy mamandary da shaqyrýly múmkin. Eń bastysy, dıssertatsııalyq jumys qorǵaýdan ótkennen keıin resmı saıttarda únemi qoljetimdi bolýy kerek», - degen mınıstrlik ókili dıssertatsııany sátsiz qorǵaǵan úmitkerlerge qaıta múmkindik berý jaǵy da naqty erejemen bekitilgenin eskertti.
«Halyqaralyq tájirıbeni eskere otyryp, qorǵaý qorytyndysy boıynsha 4 túrli sheshim qabyldaný kerek dep bekittik. Olar: PhD-doktor dárejesin berý, dáreje bermeý, qaıta tolyqtyrýǵa jiberý nemese qaıta qorǵaýǵa jiberý. Tórt sheshimniń de negizdemelik sebepteri tıptik erejede kórsetilgen», - dedi Gúlzat Kóbenova.
Buǵan deıin habarlaǵanymyzdaı, Gúlzat Kóbenova PhD dárejesin qorǵaý kandıdattyq dıssertatsııa deńgeıinde qalyp qoıǵanyn málim etken bolatyn.
Atalmysh sharada mınıstr Ashat Aımaǵambetov ǵylymı dáreje qorǵaýshylardan dıssertatsııanyń qazaq tilindegi nusqasy talap etiletinin aıtqan bolatyn.
