Jatyr moıny obyrynyń «jasaryp» bara jatqany alańdatady – onkolog
ALMATY. KAZINFORM — Almaty onkologııalyq ortalyǵyna «jatyr moıny obyrynyń II satysy» dıagnozymen 26 jastaǵy áıel jetkizildi.
Onkogınekologııa bóliminiń meńgerýshisi Raıhan Bolatbekovanyń aıtýynsha, naýqas bir jyl boıy qandy bólinister men shaǵymdarǵa qaramastan dárigerge júginbegen. Onyń eki balasy bar.
Jaǵdaıy nasharlap ketken kezde ǵana ol medıtsınalyq tekserýden ótýge kelgen.
— Onkologııalyq ortalyqtyń dárigerleri kúrdeli operatsııa jasady. Jatyr, jatyr moıny jáne regıonarlyq lımfa túıinderi alyndy. Naýqastyń jas bolǵandyqtan, dárigerler analyq bezderdi saqtap qalý týraly sheshim qabyldady, bul bolashaqta sýrrogat ana bolý arqyly ana atanýyna múmkindik beredi, – deıdi Raıhan Bolatbekova.
Úsh saǵatqa sozylǵan operatsııa sátti ótti, qazir áıel mamandardyń baqylaýynda jáne hımıo-sáýlelik terapııa túrinde qosymsha em qabyldap jatyr.
Dárigerdiń sózinshe, Almatyda jatyr moıny obyry áıelder arasyndaǵy onkologııalyq aýrýlar ishinde sút bezi obyrynan keıin ekinshi orynda tur. 2024 jyly bul dıagnoz 206 áıelge qoıyldy. Negizgi jas toby — 35-ten 50 jasqa deıingi áıelder.
— Jatyr moıny obyrynyń «jasaryp» bara jatqany alańdatady. «Mysaly, Almatyda 20–24 jas aralyǵyndaǵy qyz-kelinshekterde jatyr moıny obyry tirkelip jatyr. Erte satyda bul aýrý aıqyn belgilersiz ótýi múmkin, sondyqtan turaqty profılaktıkalyq tekserýler men skrınıngten ótý arqyly jatyr moıny obyryn bastapqy kezeńinde anyqtap, sátti emdeýge bolady, — deıdi onkogınekolog.
Memlekettik baǵdarlama aıasynda 30-dan 70 jasqa deıingi áıelder tórt jylda bir ret tegin skrınıngten óte alady. Bul — tsıtologııalyq jaǵyndy alý arqyly júrgiziletin, erte dıagnoz qoıýdyń qarapaıym ári qoljetimdi ádisi.
Dárigerler barlyq áıelge tipti bolmashy belgilerdiń ózin elemeýge bolmaıtyndyǵyn jáne gınekologqa turaqty túrde barýǵa keńes beredi. 26 jastaǵy naýqastyń jaǵdaıynda keshigý oǵan reprodýktıvti fýnktsııasyn saqtaý múmkindiginen aıyrylýyna sebep boldy.
Osyǵan deıin jatyr moıny obyrynyń qalaı aldyn alýǵa bolatyny týraly jazǵan bolatynbyz.