Jatyr moıny obyrynan qulan-taza aıyǵyp ketýge bolady – almatylyq onkolog

ALMATY. KAZINFORM – Jatyr moıny obyry áıelder arasynda jıi kezdesetin qaterli isik. Ol der kezinde anyqtalsa, onyń betin qaıtaryp, emdeýge bolady. Bul týraly Almaty №36 qalalyq emhanasynyń onkolog dárigeri Zarına Toılybaeva aıtty. 

Dárgerdiń aıtýynsha, jatyr moıny obyry ádette adam papıllomavırýsy (HPV) týdyratyn isik aldy jasýshalyq ózgeristen bastalady. 

«Eger bul ózgeris der kezinde anyqtalmasa jáne emdelmese, ol qaterli isikke aınalýy múmkin. Іsik aldy ózgeristi erte anyqtaý jáne emdeý isik damýynyń aldyn alý kezinde sheshýshi ról atqaratyny sózsiz. Ol erte anyqtalǵan jaǵdaıda tolyq emdelip ketedi. Sondyqtan júıeli túrde skrınıngtik tekserýden ótip, salaýatty ómir saltyn ustaný qajet, bul aýrýdyń aldyn alýda jáne onymen kúresýde basty ról atqarady», - deıdi onkolog.

Maman birneshe mańyzdy qaýip faktoryn atap ótti. 

«Adam papıllomavırýsy (HPV) – jatyr moıny obyrynyń negizgi sebebi. Jynystyq qatynasqa erte túsý, sozylmaly qabyný aýrýlary, jatyr moıny erozııasy, túsik túsirý, durys tamaqtanbaý – osy faktordyń bári HPV ınfektsııasynyń qaýpin arttyrýy múmkin. Temeki shegý de jatyr moıny obyrynyń damý qaýpin týdyrady», - deıdi Zarına Toılybaeva.

Onkologtyń aıtýynsha, jatyr moıny obyryn emdeý aýrýdyń satysyna baılanysty. Ol isikti hırýrgııalyq alyp tastaý, sáýlelik terapııa, hımıoterapııany nemese olardyń kombınatsııasyn qamtýy múmkin. Qaterli isik neǵurlym erte anyqtalsa, ony emdeý soǵurlym sátti bolady.