«Jat mereke janǵa batady» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, Qazaqstan Respýblıkasy Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıtetiniń derekterine qaraǵanda, elimizde sońǵy 10 jyldyń ishinde «A» vırýstyq gepatıtimen syrqattanýshylar sany 4,6 esege azaıǵan. Ústimizdegi jyldyń ótken 8 aıynda 2011 jyldyń sáıkes merzimimen salystyrǵanda qaýipti dert juqtyrǵandar 38,7 paıyzǵa, onyń ishinde 14 jasqa deıingi balalar arasynda 49,8 paıyzǵa tómendedi. Bul aqparat gazette «Aldyn alýdyń nátıjesi » degen taqyryppen berilgen.
«Qazaqstan chempıonatynyń aıaqtalýyna bir týr qalǵanda Qaraǵandynyń «Shahter» komandasy osymen ekinshi ret qatarynan el chempıony atandy. Byltyr qaraǵandylyqtar sońǵy týrǵa deıin Taldyqorǵannyń «Jetisý» kuramasymen ıyq teńestirip, básekelesip, sońǵy sátte ǵana bas júldeni jeńip alsa, bıylǵy maýsymda ózinen keıingi Pavlodardyń «Ertis» klýbyn attaı bes upaı artyq jınap, chempıondyq ataqqa ıe bolyp otyr. Qazir «Shahterdiń» enshisinde chempıonattyń aıaqtalýyna bir týr qalǵanda, 25 oıynnan keıin 17 jeńis, 2 teń oıyn jáne 6 jeńilis bar. Osylardyń bárin qosqanda komanda 53 upaıdy ıelenýde. Kenshiler sońǵy úsh upaıdy demalys kúnderi óz alańynda Qyzylordanyń «Qaısar» komandasyn 3:0 esebimen jeńgennen keıin ıelendi. Al onyń sońynan kele jatqan «Ertiste» 25 týrdan keıin 14 jeńis, 6 teń oıyn jáne 5 jeńilis bar», - dep jazady «Egemen Qazaqstan» basylymy búgingi sanynda. Atap aıtqanda, fýtbol jaıyndaǵy maqala «Shahter» - Qazaqstan chempıony» atty taqyryppen jaryq kórdi.
***
«Aıqyn» basylymy búgingi sanynda «Prozaǵa tyń qubylys ákelgen tulǵa» atty maqala basty. «Kún saıyn kezekti jıyndar men konferentsııalardan bir bosamaıtyn elordanyń eńseli zaldarynda eldiń rýhyn qanattandyryp, sanasyna serpilis ákeletin keshterdiń ótýi sırek. Ótken apta sońynda Kongress-holda qazaq ádebıetiniń kórnekti ókili, Memlekettik syılyqtyń ıegeri Tólen Ábdikovtiń mereıtoılyq jıyny sondaı olqylyqtardyń ornyn toltyrdy desek, artyq aıtqandyq emes. Qalamgerdiń 70 jasqa shyǵarmashylyq izdenistiń tizginin tartpastan, kúsh-qýatyn kemeldendire otyryp kelgeni aqıqat. Ábdikovtiń 1969 jyly áńgimeler jınaǵy toptastyrylǵan «Kókjıek» kitabynan bastalǵan ádebıettegi súrleýi búginde danalyǵy mol dańǵylǵa aınaldy. Tili tereńnen, nári ýyzdan tartylǵan jazýshyǵa oqyrmannyń ystyq yqylasy men aıryqsha qurmetin kesh barysynda taǵy bir ret sezindik...», dep jazady basylym.
Osy basylymynyń jazýynsha, «Hrıstıandardyń dinı merekesi sanalatyn Helloýındi arnaıy kostıýmder kıip atap ótýge Amerıka mektepterinde tyıym salyndy» dep habarlaıdy CBS Seattle. AQSh-ta jyl saıyn qazannyń 31-i kúni bolatyn Helloýındi atap ótý úshin oqýshylar jarty kúnge bosatylady. Bıyl keıbir jerlerde ata-analardyń narazylyǵyna qaramastan, «oqýshylarǵa bul merekeni atap ótý mindetti emes», degen sheshim shyǵarypty, Sıetl qalasyndaǵy «Lafaıet» mektebiniń ákimshiligi. Mektep ákimshiliginiń málimdeýinshe, oqýshylar bul dinı merekege qatysý úshin arnaıy kostıým daıyndaıdy. Olardy jarty kúnge sabaqtan bosatý kerek. Bul olardyń oqýyna kedergi jasaıdy. Keıbir ata-ananyń pikirinshe, tyıym salýdyń naqty sebebi munda emes, Helloýındi merekeleýdi batystyq mádenıetten aýlaq bolǵysy keletin keıbir adamdar jaqtyrmaıdy.
Búkil áýlıeler kúni qarsańynda, qazannyń 31-i kúni atap ótiletin Helloýın - ejelgi Irlandııa men Shotlandııa keltteriniń dástúrli merekesi. Rımdegi katolıkter ony hrıstıandyqqa qatysy bar
dinı meıram retinde qabyldaıdy. Sonymen qatar keıbir hrıstıandar Helloýındi putqa tabynýdan qalǵan nemese okkýltızm baǵytyndaǵy, hrıstıandyq ıdealdarǵa qarsy degen pikirde. Bul jaıynda «Aıqyn» basylymynyń búgingi sanynda «Jat mereke janǵa batady» atty maqaladan oqı alasyzdar.
***
«DSU-ǵa jedeldete kirmesek, ulttyq-ekonomıkalyq, strategııalyq turǵydan utylamyz» - Bul pikirdi «Alash aınasy» gazetine arnaıy suhbat bergen saıasattanýshy Saıpolla Sapanov aıtady. Sarapshy, Reseıdiń Dúnıejúzilik saýda uıymyna enýine baılanysty Kedendik odaq aıasynda týyndaǵan máselelerdi sóz etedi. Sondaı-aq Qazaqstannyń saýda uıymyna enýinen ne kútýge bolady jáne Eýrazııalyq odaq jaıyndaǵy túrli suraqtarǵa jaýap beredi.
Osy basylymdaǵy maqalada Qazaqstannyń jylqy sharýashylyǵy ózge elderge táýeldi bolyp qalǵanyn baıandalady. Kúni keshe Kanadanyń azyq-túlik ınspektsııasynyń dırektory Lýıza Karer Keden odaǵy elderine jylqy etin tasymaldaýǵa yqylasty ekendikterin jetkizdi. Qazirde bul usynysqa birinshi bolyp Qazaqstan tarabynyń qyzyǵýshylyq tanytyp otyrǵany belgili boldy. Sol-aq eken, elimizdegi biraz qaýym: «Qazaqtyń dastarqanynan kanadalyq jylqy eti oryn alsa, óz ónimimiz ógeısip qalady» dep órekpip otyr.
Jalpy, derekke júginsek, búginde bizdiń elimizde 1,5 mln bas jylqy bar. Jan basyna shaqqanda jylqy eti elimizdegi árbir adamǵa 4 keli 300 gramnan tıedi. «2015 jylǵa deıin bul kórsetkishti 9 kelige jetkizý josparda bar. Sondyqtan keleshekte biz arzan, ári dámdi jylqy etimen ishki naryqty tolyq qanaǵattandyramyz desek, shet elden elimizge keletin iri qara malynyń baǵdarlamasy odan ári júzege asýy qajet», - desedi mamandar.
