Jasyl Astana: Elordada búgin kóktemgi ekologııalyq aılyq bastaldy

ASTANA. QazAqparat - Astana qalasynda 8 sáýirden 6 mamyrǵa deıin sanıtarlyq tazalaý, abattandyrý jáne kógaldandyrý boıynsha «Jasyl Astana» kóktemgi ekologııalyq aılyǵy ótedi, dep habarlaıdy QazAqparat elorda ákimdiginiń resmı saıtyna silteme jasap.

Al turǵyndardyń, bıznes ókilderiniń, memlekettik jáne basqa da organdardyń qatysýymen jappaı jalpyqalalyq senbilikter 15 sáýir men 6 mamyrda ótedi.

Ekologııalyq aılyq aıasynda qalany, nóser jáne káriz jelilerin sanıtarlyq tazartý, kóshelerdi, trotýarlar men kvartalishilik aýmaqtardy tazalaý, saıabaqtar men gúlzarlardaǵy jasyl jelekterdi kútý boıynsha maýsymdyq agrotehnıkalyq jumystar, saýda nysandaryna irgeles aýmaqtardy jınaý, kógaldar men gúlzarlar alańdaryn ornatý jónindegi is-sharalar, ruqsat etilmegen qoqys úıindileri men lastanǵan ýchaskelerdi joıý jumysy júrgiziledi.

Sonymen qatar, «Jasyl Astana» aktsııasy aıasynda 10 myńnan astam jasyl jelek otyrǵyzý josparlanyp otyr.

Qala kásiporyndaryn, MIB (PIK), shaǵyn jáne orta bıznes sýbektilerin (bazarlar, saýda oıyn-saýyq ortalyqtary jáne basqalar), oqý oryndaryn, eriktiler men belsendi qala turǵyndaryn ekologııalyq aılyqqa qatysýǵa shaqyramyz.

Sondaı-aq elorda turǵyndary men qonaqtaryn kvartalishilik (úı mańyndaǵy) aýmaqtardy tazalaýǵa shaqyramyz.

Aıta keteıik, 2022 jyly ekologııalyq senbilikter aıasynda barlyǵy 6 myń tonnadan astam qoqys shyǵarylǵan. Sol sııaqty 29 myńnan astam aǵash otyrǵyzylyp, 2,7 mln sharshy metr alań jınaldy. Ekologııalyq aktsııa asynda 266 067 adam qamtylǵan bolatyn.