Jastarǵa óz oblysynda áskerı boryshyn óteýge tańdaý berile me

NUR-SULTAN. QazAqparat – Qazaqstanda áskerge shaqyrylǵan jastarǵa óz oblysynda boryshyn óteı alatyndaı tańdaý berile me? Bul suraqqa QR Qarýly kúshteri Bas shtabynyń uıymdastyrý, jumyldyrý jumystary departamentiniń bastysy Sáken Júsipov jaýap berdi, dep habarlaıdy QazAqparat tilshisi.

«Merzimdi áskerı qyzmetke shaqyrýdy josparlaý, uıymdastyrý jumysy shaqyrylǵan azamattardy basqa óńirlerde áskerı boryshyn óteýdi qarastyrady. Máselen soltústik óńirden shaqyrylǵan azamattar mindetti túrde áskerı boryshyn shyǵysta nemese batysta óteıdi. Áskerdi jasaqtaýdyń atalmysh aýmaqtyq qaǵıdaty jas azamattardy basqa aımaqtardyń klımattyq jaǵdaıyna beıimdep, fızıkalyq turǵyda myǵym bolýyna septigin tıgizedi», - dedi Sáken Júsipov OKQ-da onlaın rejımde ótken baspasóz máslıhatynda.

Onyń aıtýynsha keıbir áskerı bólimniń ereksheligi onsyz da aýmaqtyq qaǵıdattyń saqtalýyn talap etedi.

«Máselen qoǵamdyq tártipti saqtaýǵa jumyldyrylǵan Ulttyq ulannyń áskerı bólimderi men qylmystyq-atqarý júıesindegi túzetý mekemelerin osy sanatqa jatqyzýǵa bolady», - dedi ol.

Aıta ketsek buǵan deıin Sáken Júsipov TJ kezinde 2019 jyldyń kókteminde áskerge shaqyrylǵan merzimdi áskerı qyzmetshilerdi zapasqa shyǵarý ýaqytsha toqtatylǵanyn málim etken edi. Sonymen qatar Memleket basshysynyń Jarlyǵymen azamattardy merzimdi áskerı qyzmetke shaqyrý merzimi 2020 jyldyń maýsymynan tamyzyna aýystyrylyp otyr.

Eske sala ketsek QR Prezıdenti Qasym-Jomart Toqaev áskerı qyzmetshilerdi zapasqa shyǵarý týraly Jarlyqqa qol qoıǵan bolatyn.

Foto: astana.gov.kz