Jastar arasynda ekologııalyq partııaǵa degen suranys joǵary – Indıra Rystına
«Prezıdenttiń Joldaýy aıasynda eldegi 6 saılanbaly ınstıtýtqa endi 2 ınstıtýt qosylady. Atap aıtsaq, 2024 jyldan bastap aýdan ákimderiniń saılaýy bastalady. Saıası reformanyń tórtinshi paketinde osyndaı jospar bar. Sondaı-aq, Prezıdenttiń usynysymen oblys ákimdigine úmitker eki adamnyń oblystyq máslıhattar arqyly shyǵyp, tańdalýy janama saılaýǵa jol ashady. Sonda elimizde 8 ınstıtýttyń ókilderi saılanbaly tásil arqyly qyzmetke alynady», - dedi sarapshy.
Atalǵan saılanbaly ınstıtýttarǵa degen eldiń senimi qanshalyqty deńgeıde ekenin bilý úshin Qazaqstan strategııalyq zertteýler ınstıtýty saýalnama júrgizgen eken.
«Bul saýalnama Joldaýdan buryn, aqpan aıynda jasaldy. Sonyń qorytyndysy boıynsha halyqtyń 81,4 paıyzy Prezıdentke senim artatynyn kórsetti. Qalǵan ınstıtýttarǵa degen senim áldeqaıda tómen. Mysaly, Úkimetke degen senim – 53,2 paıyz, Parlamentke degen senim – 50,4paıyz, jergilikti ákimderge degen senim 59,4 paıyz, oblys ákimderine degen senim 51,8 paıyz boldy. Eń tómengi senim kórsetkishteri máslıhattardyń úlesinde – 45,5 paıyz. Saıası partııalarǵa degen senim 43,7 paıyz ǵana boldy», - dedi Indıra Rystına.
Aıtýynsha, soǵan qaramastan qoǵamda jańa saıası partııalarǵa degen suranys óte úlken.
«Ásirese ekologııalyq talaptardy maqsat retinde ustanaty Jasyldar partııasyna degen suranys baıqalyp otyr. Qolǵa alynyp jatqan saıası reformalardyń aıasynda saıası partııalar qurýǵa jeńildikter bar. Partııany tirkeýge qajet qoldar sany 20 myńnan 5 myńǵa deıin azaıtyldy. Tirkeýden ótýdiń merzimi de keńeıtildi. Osyny negizge alyp, aralaryńyzda Jasyldar partııasyn qurýǵa nıet bildirip jatsańyzdar, ǵylymı negizdeme bar ekenin eskerýlerińizge bolady», - dedi Qazaqstan strategııalyq zertteýler ınstıtýtynyń áleýmettik-saıası zertteýler bóliminiń basshysy.
Aıta keteıik, búgin astanada «Jastardyń jańa Qazaqstandy qurýdaǵy róli» atty analıtıkalyq dıskýrs ótti.
