Jastar arasynda erekshe áleýmettik eksperıment júrgizildi

ASTANA. KAZINFORM — Abaı oblysynyń esirtkige qarsy kúres basqarmasy erekshe áleýmettik eksperımentti júzege asyrdy, - dep jazdy Polisia.kz.

Onyń maqsaty – jastardy esirtki qylmysyna tartýdyń jasyryn ádisterine qoǵam nazaryn aýdarý, jasóspirimderdiń quqyqtyq sanasyn tekserý jáne zańsyz usynystarǵa olardyń qalaı jaýap beretinin anyqtaý boldy.

Eksperıment barysynda polıtsııa qyzmetkerleri kóshede júrgen jasóspirimderge kúmándi jumys usyndy. Tapsyrma qarapaıym bolyp kórindi: qabyrǵaǵa belgisiz kodtar men siltemeler jazý. Mundaı jazýlar is júzinde ınternet arqyly esirtki satatyn saıttardy jarnamalaýdyń jasyryn tásili ekeni belgili.

Jumys aqyly usynylǵanymen, bul is-shara shyn máninde quqyqtyq tájirıbe bolatyn. Nátıjesi kóńil qýantady: birde-bir jasóspirim zańsyz usynysqa kelisken joq. Barlyǵy da mundaı áreketterdiń zańǵa qaıshy ári aýyr saldary bolýy múmkin ekenin aıtyp, tapsyrmadan bas tartty.

Bul tájirıbe jastardyń quqyqtyq saýattylyǵynyń artqanyn, sondaı-aq qoǵamda esirtkige degen teris kózqaras berik qalyptasyp kele jatqanyn kórsetti.

Aıta keteıik, Astanada bıyl 500-den astam esirtki graffıtıleri anyqtalyp, boıaldy.