Jasóspirimder arasynda AITV juqtyrý 2 ese kóbeıgen
ASTANA. KAZINFORM — Elimizde jasóspirimderdiń 34%-y prezervatıvti qalaı qoldaný keregin bilmeıdi. Al AITV jáne onyń juǵý joldary týraly aqparattanǵan 18 jasqa deıingi balalardyń úlesi 9% ǵana.
Bul týraly QR Densaýlyq saqtaý mınıstrligine qarasty Medıtsınalyq kómekti uıymdastyrý departamentiniń dırektory «AMANAT» partııasy janyndaǵy Otbasy jáne halyqty áleýmettik qorǵaý jónindegi keńes otyrysynda habarlady.
— 2018-2023 jyldar aralyǵynda 14-18 jastaǵy jasóspirimder arasynda AITV (VICh) ınfektsııasyn juqtyrý jaǵdaılary 2,2 esege artty — 138-den 311 jaǵdaıǵa deıin. Ýrogenıtaldy, hlamıdııalyq ınfektsııalar — 76-dan 134-ke, ýrea-mıkoplazmalyq ınfektsııalar — 222-den 392-ge deıin kóbeıgen, — deıdi Gúlnár Sársenbaeva.
Mamannyń aıtýynsha, elimizdegi jasóspirimderdiń besten biri ǵana júktilikten nemese jynystyq jolmen juǵatyn ınfektsııalardan qorǵaný tásilin biledi eken.
— BUU Halyq qonystanýy qory júrgizgen 2017-2019 jyldardaǵy zertteý nátıjeleri boıynsha jasóspirimderdiń qazirgi zamanǵy kontratseptıv quraldaryn qoldanýy — el boıynsha jáne aımaqtarda 20%-dan aspaıdy, — deıdi QR Densaýlyq saqtaý mınıstrliginiń mamany.
Aıta keteıik, Ózbekstanda sheteldikter men mıgranttarǵa VICh-ke mindetti testileý engizilmek.