Jasóspirimderdi koronavırýsqa qarsy vaktsınalaýdy jedeldetý qajet - professor

ALMATY. QazAqparat - Halyqty, onyń ishinde jasóspirimderdi koronavırýsqa qarsy vaktsınalaýdy jedeldetý qajet. Bul týraly Almaty qalasynyń óńirlik kommýnıkatsııalar qyzmetinde S.Asfendııarov atyndaǵy Qazaq ulttyq medıtsına ýnıversıtetiniń Juqpaly jáne tropık aýrýlar kafedrasynyń professory, medıtsına ǵylymdarynyń doktory Kúlásh Qurmanova aıtty, dep habarlaıdy QazAqparat tilshisi.

«SARS-CoV-2 jańa juqpaly shtamdarynyń paıda bolýyna baılanysty qala turǵyndary, sonyń ishinde jasóspirimderdi koronavırýsqa qarsy vaktsınalaýdy jedeldetý kerek», - deıdi spıker.

Kúlásh Qurmanova balalardy, júkti áıelderdi jáne bala emizetin analardy vaktsınatsııalaýǵa qatysty derekter jetkilikti jınaqtalǵanyn atap ótti. Sondyqtan Pfizer kompanııasynyń Comirnaty preparatynyń qaýipsizdigine alańdaýǵa nemese kúmándanýǵa negiz joq. Sonymen qatar, professor qalanyń «jasyl» aımaqqa kóshkennen keıin de, ásirese, JRVI-men syrqattanýshylyqtyń ósýi kezeńinde qaýipsizdik sharalaryn saqtaýdy jalǵastyrý qajet ekenin eske saldy.

«Vaktsınatsııanyń birinshi kýrsynan keıin 6 nemese 9 aıdan keıin revaktsınatsııadan ótý qajet. Antıdeneler deńgeıi birtindep tómendeıdi, al údetkish vaktsına uzaq ýaqyt saqtalatyn jasýshalyq ımmýnıtetti qosý arqyly olardyń aıqyn qalyptasýyna yqpal etedi», - dep keńes berdi professor.

Ol koronavırýs pandemııasy áli de jalǵasyp jatqanyn jáne ınfektsııanyń jańa tolqyndarynyń bolýy múmkin ekenin eske saldy. Sondyqtan jappaı ımmýndaný qajet.