Jasyl qospa: Qazaqstanda rýkkola, asjapyraq, jalbyz ben kók jýa baǵasy qansha
Qazaqstan óńirlerinde rýkkola, asjapyraq (shpınat), jalbyz ben kókjýa baǵasy bir-birinen óte alshaq. Ásirese shyǵys jáne soltústik óńirlerde kók jýa baǵasy ǵana kóńilge qonymdy, al jalbyz ben rýkkola baǵasy joǵary, dep habarlaıdy Kazinform agenttiginiń tilshisi.
Derekterge súıensek, rýkkola men jalbyzdyń óńirlerdegi baǵasynyń bir-birinen óte alshaq bolýy aımaq pen logıstıkaǵa tikeleı baılanysty. Sonymen birge asjapyraq baǵasy da ártúrli. Al kókjýa kóp jerde ósedi, sondyqtan bolar baǵa qoljetimdi.
Sondaı-aq baǵa óńirdiń klımaty, jergilikti taýar óndirýshilerdiń deńgeıi, ınfraqurylym jáne suranysqa tikeleı baılanysty. Resmı statıstıkada rýkkola, asjapyraq, jalbyz ben kók jýa baǵasynyń ındeksi joq. Degenmen kóterme bazar men saýda oryndaryndaǵy derekterden baǵaǵa aımaq pen merzim tikeleı áser etetini belgili boldy. Máselen rýkkola men asjapyraq kóterme bazarlarda bar. Ony ósiretin sharýalar tikeleı jetkizip otyr. Sáıkesinshe baǵa turaqty bolady.
Al kókjýa men jalbyz bolsa maýsymdyq qospa túrine jatady. Sondyqtan jasyl dámdeýishterdiń baǵasy jaz aılarynda arzan. Munda da logıstıka áseri bar. Qazaqstannyń ońtústik óńirlerinde baǵa ózgelerge qaraǵanda tómen bolary túsinikti. Sebebi munda aýa raıy kók shóp ósirýge yńǵaıly ári ónimdi tez alýǵa bolady. Al ortalyq jáne soltústik óńirler ony dál osy ońtústikten tasymaldaıdy. Ózderiniń ónimi kesh shyǵady. Sáıkesinshe baǵa da joǵarylaı túsedi.
Rýkkola
Rýkkolanyń kelisi orta eseppen qazir 3000-4000 teńge bolyp túr. Eń qymbaty Aqtóbe qalasynda satylyp jatyr. Munda rokkolanyń kelisi 6500 teńge turady. Sodan keıingi orynda Semeı (6200 tg/kg), Óskemen (6150 tg/kg), Qonaev pen Taldyqorǵan (6000 tg/kg) tur. Al eń arzan rýkkolany Petropavldan satyp alasyz. Munda kelisi 1200 teńge turady.
Qaraǵandy, Aqtaý, Astana, Atyraý, Jezqazǵan, Pavlodar men Qyzylordada rýkkola baǵasy shamamen 2 000-3 000 teńge aralyǵynda. Al Oral, Taraz, Túrkistan, Shymkent pen Qostanaıda kelisi 3 000 - 5 000 teńge aralyǵynda.
Asjapyraq
Kók shóptiń bul túri Taldyqorǵan (5750 tg/kg), Kókshetaý men Semeıde (5500 tg/kg) qymbat, al Qaraǵandyda (1850 tg/kg) arzan. Jalpy asjapyraq baǵasy da rýkkolaǵa shamalas. Ortasha baǵasy 3000-4000 teńge. Mundaı baǵany Astana, Almaty, Aqtaý, Oral, Shymkent, Qyzylorda, Taraz ben Túrkistannan tabýǵa bolady.
Al Atyraý men Jezqazǵanda baǵa 2000 teńgeden bastalyp, 3000 teńgege deıin jetedi.
Aqtóbe, Petropavl, Qostanaı, Kókshetaý, Semeı, Óskemen men Qonaevta shpınattyń kelisi 4000-4500 teńge turady.
Jalbyz
Ózge dámdeýishke qaraǵanda jalbyz baǵasy áldeqaıda qymbat bolyp shyqty. Máselen Óskemen men Semeıde kelisi 7000 teńge turady. Al Kókshetaýda kelisi – 6000 teńge. Eń arzany Almaty (2000 tg/kg) men Atyraý (2000 tg/kg) qalalarynda satylyp jatyr.
Oral, Qostanaı, Óskemende jalbyzdyń kelisin orta eseppen 5000-5900 teńgeden satyp alýǵa bolady. Al Astana, Pavlodar, Túrkistan, Aqtaý men Aqtóbe, Shymkent pen Qyzylordada kelisi orta eseppen 2500-3000 teńge turady. Qaraǵandy, Jezqazǵan, Qonaev, Taldyqorǵanda baǵa sál joǵary, ıaǵnı kelisi 3000-4500 teńge.
Kók jýa
Eń kóp taralǵany, kópshiliktiń jıi tutynatyny da osy kók jýa. Kóbine ony kelilep emes, býmasyn alady. Salmaǵy shamamen 100-150 gramm tartady. Qazaqstanda bir býma kók jýanyń ortasha baǵasy shamamen 200-300 teńge. Eń arzany Atyraý qalasynda satylady. Munda baǵa 100 teńge. Al salatqa qosatyn kók jýa býmasynyń eń qymbaty 620 teńge turady. Mundaı baǵany Óskemen men Semeıden kezdestirýge bolady.
Aıta keteıik, ótken aptada Kazinform suranysqa ıe shıe men tańqýraı baǵasyn salystyrdy.