Jasyl dáliz: Qazaqstan, Ázerbaıjan, Ózbekstan birlesken kásiporyn qurmaqshy
ASTANA.KAZINFORM — Bakýde «Ázerbaıjan — Ortalyq Azııa: Jasyl energetıkalyq dáliz» jobasy aıasynda birlesken kásiporyn qurý týraly qujatqa qol qoıyldy. Qujatqa Ázerbaıjan Energetıka mınıstrliginde Qazaqstannyń elektr jelilerin basqarý kompanııasy, «Azerenerjı» AQ jáne Ózbekstannyń Ulttyq elektr jelileri AQ ókilderiniń qatysýymen qol qoıyldy, dep habarlady Kazinform agenttiginiń menshikti tilshisi.
Jańa qurylym — «Yaşıl Dəhliz Birliyi» JShS — «Ázerbaıjan — Ortalyq Azııa: Jasyl energetıkalyq dáliz» strategııalyq jobasyn júzege asyrý maqsatynda qurylyp otyr. Bul joba ekologııalyq taza energııany tasymaldaýǵa arnalǵan transulttyq ınfraqurylymdy damytýǵa jáne óńirlik energetıkalyq yntymaqtastyqty nyǵaıtýǵa baǵyttalǵan.
Ázerbaıjan Energetıka mınıstrliginiń habarlaýynsha, mınıstrdiń orynbasary Elnýr Soltanov Ázerbaıjan, Qazaqstan jáne Ózbekstan úkimetteri arasynda BUU Klımattyń ózgerýi jónindegi negizdemelik konventsııasy taraptarynyń konferentsııasyna (COP29) daıyndyq aıasynda qol qoıylǵan strategııalyq seriktestik kelisiminiń mańyzdylyǵyn atap ótti.
— Jasyl dáliz odaǵyn qurý bizdi ortaq ekologııalyq maqsattarǵa jaqyndatyp qana qoımaı, óńirlik energetıkalyq yntymaqtastyqty da nyǵaıtady, — dedi Soltanov.
Sondaı-aq úsh eldiń energetıka mınıstrlikteri men Saýd Arabııasy Koroldigi arasyndaǵy osy joba boıynsha oryndalý baǵdarlamasynyń mańyzdylyǵy atap ótildi.
Kelisimge sáıkes, «Jasyl dáliz odaǵy» JShS-niń bas keńsesi Bakýde ornalasatyn bolady. Jobanyń júzege asyrylýy ulttyq turaqty damý maqsattaryna qol jetkizýge, energetıkalyq qaýipsizdikti arttyrýǵa jáne jańartylatyn energııa kózderine kóshý protsesin jedeldetýge eleýli úles qosady dep kútiledi.
Qujattarǵa qol qoıý rásimine Qazaqstannyń Elektr jelilerin basqarý jónindegi operatsııalyq kompanııasynyń bólim bastyǵy Saltanat Shunaeva, «AzerEnerjı» AQ vıtse-prezıdenti Zııaddın Gýlıev jáne Ózbekstannyń Ulttyq elektr jelileri AQ basqarma tóraǵasynyń orynbasary Ferýz Kýrbonov qatysty.
Jańa kásiporynnyń basshysy bolyp Farhad Mamedov taǵaıyndaldy. Ol jobanyń strategııasyn júzege asyrý jáne dálizdi damytý jumystaryn basqarady.
Buǵan deıin, sáýir aıynda Qazaqstan, Ázerbaıjan jáne Ózbekstan azııalyq banktermen «jasyl» energetıkalyq dáliz jobasy boıynsha memorandýmǵa qol qoıǵan bolatyn.
Aıta keteıik, bul bastama 2024 jyldyń qarasha aıynda COP29 sheńberinde memleket basshylary qol qoıǵan jasyl energııany damytý jáne taratý jónindegi strategııalyq áriptestik týraly kelisimniń jalǵasy bolyp tabylady.
Eske sala keteıik, buǵan deıin Ázerbaıjan áıelderdiń zeınetke shyǵý jasyn taǵy 6 aıǵa uzartqanyn jazǵan edik.