«Jasyl damý» qarjysyna jańa avtobýstar satyp alynady
ASTANA. KAZINFORM – Májiliste tasymaldaý qyzmetin ózin-ózi retteý uıymdary arqyly retteýge arnalǵan zań jobasyn tanystyrǵan Kólik mınıstri Marat Qarabaev «Jasyl damý» qarjysyna oblystar arasyna qatynaıtyn jańa avtobýstar satyp alynatynyn aıtty.
Zań jobasyn talqylaý kezinde Májilis depýtaty Anas Baqqojaev eskirgen avtobýstardyń máselesi qalaı sheshiletinin surady.
«Siz shetelde bolyp, týrızmdi kórip júrsiz. Ol jerde kóliktiń yqpaly óte joǵary. Qosqabatty avtobýstar, «komfort» sanatyndaǵy taksıleri bar. Bizdiń Qazaqstanǵa qarasańyz, kóbiniń tozyǵy jetken. Astana qalasynyń mańyndaǵy bazardaǵy avtobýstardyń ózin qarasańyz, sodan túsinýge bolady. Halyqaralyq deńgeıde júretin avtobýstardyń tozý kórsetkishi 84 paıyz. Oblystar arasynda júretin avtobýstardyń 68 paıyzynyń tozyǵy jetken. Osy avtobýs parkin qalaı jańartasyzdar?», - dep surady depýtat.
Kólik mınıstri bul máseleni «Jasyl damý» qorynyń esebinen sheshý jospary bar ekenin aıtty.
«Eki jyl buryn úlken baǵdarlama bastaldy. Sonyń sheńberinde 3 myńǵa jýyq qalalyq avtobýs jańartyldy. Nátıjesinde, qalalyq avtobýstardyń tozý deńgeıi 52%-dan 22%-ǵa deıin tómendedi. Sol jańartý nesıesinen revolver túrinde kelgen 30 mıllıard teńge bar. Sodan soń «Jasyl damý» arqyly buryn bólingen júz mıllıard teńge bar. Sodan túsken revolverlik aqshany taǵy da bir baǵyt retinde halyqaralyq jáne oblysaralyq kólik qatynasyna qatysatyn avtobýstardy satyp alýǵa jumsamaqshymyz. Sonyń esebinen jańartýdy kózdep otyrmyz», - dedi Marat Qarabaev.
