Jasyl álemdi birge quraıyq: 10 myńnan astam jambyldyq oqýshy aǵash tuqymdaryn ekti
TARAZ. KAZINFORM - Jambyl oblysynyń ákimi Erbol Qarashókeev Taraz qalasyndaǵy Sh. Murtaza atyndaǵy №30 mektep-gımnazııasynyń oqýshylarymen birge «Jasyl álemdi birge quraıyq!» atty ekologııalyq aktsııaǵa qatysty.
Aktsııanyń maqsaty – aǵash tuqymdaryn egý jáne ósirý arqyly mektep oqýshylarynyń tabıǵatqa degen yqylasyn oıatyp, qorshaǵan orta aldyndaǵy jaýapkershiligin arttyrý.
Erbol Qarashókeev oqýshylarmen birge qylqan japyraqty aǵash tuqymdaryn (bozarsha, arsha, shyrsha, qaraǵaı) ekti.
Balalar kóktemde ekken aǵash tuqymdaryn oqý jylynyń sońyna deıin synyptarynda baqylap, kútip-baptaıdy. Jazǵy demalys kezinde olar jas óskinderdi úılerine aparyp, kútim jasaýdy jalǵastyrady. Kúzde sol kóshetterdi mektep aýlasyna otyrǵyzý josparlanýda.
Oblys ákimi ekken aǵash tuqymdarynyń ósip-ónýin baqylaýdy mektep-gımnazııanyń prezıdenti Mereı Dáýletkereı óz jaýapkershiligine aldy.
– Taza qorshaǵan orta – halyq densaýlyǵynyń kepili.
Ótken jyly Memleket basshysy Qasym-Jomart Kemeluly Toqaevtyń bastamasymen elimizde «Taza Qazaqstan» ekologııalyq aktsııasy bastaý alǵan bolatyn. Búginde bul aktsııa el aýmaǵynda ekologııalyq tazalyqty saqtaý men qorshaǵan ortany qorǵaýǵa baǵyttalǵan mańyzdy is-sharaǵa aınaldy.
Sizder de týǵan jerdiń tazalyǵyn saqtaýǵa jáne onyń kórkeıýine óz úlesterińizdi qosyp kelesizder. Tabıǵatqa janashyrlyq tanytyp, qorshaǵan ortanyń tamasha kórinisin saqtaý – árbir azamattyń boryshy.
Kúz mezgilinde aǵash kóshetterin otyrǵyzý rásimine kýá bolaıyq! – degen óńir basshysy balalarǵa oqýda ozat bolyp, bıik shyńdardy baǵyndyrýlaryna tilektestigin bildirdi.
Shara barysynda «Taza Qazaqstan» respýblıkalyq ekologııalyq aktsııasy aıasynda uıymdastyrylǵan «Men Qazaqstan ekologııasyn jaqsartýǵa qandaı úles qosamyn?» atty oblystyq shyǵarmalar baıqaýynyń marapattaý rásimi ótti.
Baıqaýda 2 530 oqýshy baq synap, onyń ishinde 3 úzdik shyǵarma ıesi – T. Rysqulov aýdanynan Nurálı Kerimbek, Jýaly aýdanynan Aıdyn Artyqbaı jáne Taraz qalasynan Zańǵar Aıtbaı jeńimpaz atandy.
Oblys ákimi jeńimpazdarǵa velosıped sertıfıkattaryn tabystady.
Aıta keteıik, Jambyl oblysynda «Jasyl álemdi birge quraıyq!» aktsııasyna 248 mekteptiń 10 375 oqýshysy óz úlesterin qosty.
-Tabıǵı resýrstar jáne tabıǵat paıdalanýdy retteý basqarmasy bilim bólimderine aǵash tuqymdaryn taratyp, tuqym egý boıynsha ádistemelik nusqaýlyqtar usyndy,-delingen Jambyl oblysy ákiminiń baspasóz qyzmeti taratqan aqparatta.
Osyǵan deıin «Taza Qazaqstan» jobasy aıasynda bir jylda 1,6 mln túp aǵash egilgeni týraly jazdyq.