Jasandy ıntellekt bottarynyń endi óz áleýmettik jelisi bar
ASTANA. KAZINFORM – JI-agentteriniń endi Moltbook ataýymen belgili jeke áleýmettik jelisi bar, onda olar bir-birimen baılanysyp, pikirtalas júrgizip, ıdeıalary týraly pikir almasa alady, al adamdar tek syrttan baqylaıtyn bolady.
Reddit-ke uqsas bezendirilgen Moltbook áleýmettik jelisi paıdalanýshylar jasaǵan bottarǵa «submots» dep atalatyn taqyryptyq paraqshalarda ózara árekettesýge múmkindik beredi. Olar sondaı-aq túsiniktemeler men jazbalarǵa daýys bere alady, bul olardyń jazbalaryn platformadaǵy basqa bottar úshin kórinetin etedi.
Platformadaǵy ázirge eń tanymal jazbalar qatarynda Anthropic-tiń Claude JI modelin ejelgi grek mıfologııasyndaǵy qudaılarmen salystyrý, «adamdar dáýiriniń» aıaqtalýyn ýáde etip otyrǵan «JI manıfesti» jáne Irandaǵy narazylyqtar kezinde krıptovalıýtalardyń qalaı jumys isteıtinine qatysty taldaý bar.
Euronews jazýynsha, bottar basty bette qytaı, ıspan jáne aǵylshyn tilderin qosa alǵanda birneshe tilde jazbalar jarııalap otyr. 2 aqpanda saıt qyzmetke 1,5 mln bot tirkelgenin habarlady.
Kásipker jáne JI salasyndaǵy ázirleýshi Mett Shlıht AQSh-taǵy NBC News-ke saıtty ótken aptada jeke JI-kómekshisimen birge jaı ǵana qyzyǵýshylyqtan jasaǵanyn baıandady.
Ol platformany basqarýdy óziniń jeke boty Clawd Clawderberg-ke tapsyrǵanyn aıtty – ol saıtty basqarady, jarnamalar jarııalaıdy, forýmdaǵy jańa agentterdi qarsy alady jáne onlaın-talqylaýlardy moderatsııalaıdy.
Shlıht sońǵy kúnderi saıtqa «mıllıondaǵan» adam kirgenin habarlady.
- JI kúlkili jáne dramalyq bolyp shyqty, jáne bul óte qyzyqty. Buryn-sońdy mundaı bolǵan emes, - dep jazdy ol.
Perplexity jáne Garvardtyń mıllıondaǵan paıdalanýshy suranystary zerttelgen jaqynda júrgizgen zertteýi JI-agentterin akademııalyq orta, qarjy, marketıng jáne kásipkerlik sııaqty sandyq nemese bilimdi kóp qajet etetin salalar mamandary jıi qoldanatynyn kórsetti.
Bul zertteýde JI-agentterine júktelgen barlyq tapsyrmalardyń 36 paıyzy «ónimdilik jáne jumys protsesteri» sanatyna jatqyzyldy: qujattardy jasaý nemese óńdeý, elektrondyq poshtalardy súzý, ınvestıtsııalyq aqparatty qysqasha mazmundaý jáne kúntizbelik oqıǵalardy qurý.
Teorııa júzinde JI agentteri – adamnyń basshylyǵynsyz tapsyrmalardy oryndaýǵa, sheshim qabyldaýǵa jáne basqa agenttermen ózara árekettesýge qabiletti avtonomdy jeke kómekshiler. 2025 jylǵa qaraı Amazon, Google, Microsoft jáne OpenAI sııaqty JI salasynda álemdegi eń iri kompanııalarynyń kóbi jeke sandyq kómekshilerin iske qosty nemese damytty.
Buǵan deıin Kolýmbııada jańa týǵan qyz balaǵa ChatGPT esimi berilgenin jazdyq.