Jasandy ıntellekt: 440 myń stýdent kýrstardan ótti
ASTANA. KAZINFORM — AI-Sana baǵdarlamasy aıasynda 650 myń stýdent jasandy ıntellekt negizderine oqytylady. Bul týraly QR Ǵylym jáne joǵary bilim mınıstri Saıasat Nurbek málim etti.
- Jasandy ıntellekt salasynda kadrlar daıarlaý jáne ǵylymı zertteýler júrgizý úshin joǵary oqý oryndarynda ınfraqurylymdy damytýǵa erekshe nazar aýdarylyp otyr. Jetekshi ýnıversıtetterdiń bazasynda ǵylym men praktıkany ushtastyratyn jasandy ıntellekt boıynsha arnaıy ortalyqtar men zerthanalar quryldy. Sonymen qatar, elimizdegi Qazaq ulttyq ýnıversıteti, Eýrazııalyq ulttyq ýnıversıteti, Sátbaev Ýnıversıteti, Nazarbaev Ýnıversıteti sııaqty joǵary oqý oryndarynyń bazasynda sýperkompıýterlerdiń akademııalyq klasteri qalyptasýda. Aldaǵy ýaqytta bul qýattardy biryńǵaı jelige biriktirip, eldiń barlyq óńirlerindegi joǵary oqý oryndarynyń qol jetkizýin qamtamasyz etý mindeti qoıylyp otyr, - dedi S. Nurbek.
Onyń aıtýynsha, jasandy ıntellekt damýy tek esepteý qýaty men ǵylymı ınfraqurylymdy ǵana emes, eń aldymen barlyq stýdent pen men oqytýshylardyń jasandy ıntellekt salasyndaǵy bazalyq saýattylyǵyn arttyrýdy talap etedi. Osy maqsatta Prezıdenttiń 2024 jyly bergen tapsyrmasyn oryndaý aıasynda, AI-Sana baǵdarlamasy ázirlenip, ony kezeń-kezeńimen iske asyrý bastaldy. Baǵdarlama barlyq deńgeıdegi stýdentterdi, magıstranttardy jáne jas zertteýshilerdi qamtıdy.
- Birinshi kezeńde 650 myń stýdentti jasandy ıntellekt negizderine oqytý kózdelgen. Qazirgi kezde 440 myń stýdent kýrstardan ótip, sertıfıkat aldy. Olar Huawei, Coursera, Astana Hub jáne ýnıversıtetterdiń jeke baǵdarlamalary boıynsha oqydy. Kelesi kezeńderde – jasandy ıntellektini tereńdetip oqytý, tehnologııalyq kásipkerlik, salalyq jobalar ázirleý jáne startaptardy akseleratsııalaý josparlanǵan. Osylaısha, AI-Sana baǵdarlamasy EKSPO aýmaǵynda ornalasqan Alem.AI Halyqaralyq jasandy ıntellekt ortalyǵy úshin adamı kapıtaldyń negizgi kózi bolady, - dedi mınıstr.
Onyń sózine qaraǵanda, baǵdarlamanyń birinshi kezeńiniń ózinde stýdentter jasandy ıntellekt negizinde 119 «jasandy ıntellekt kómekshilerin» ázirledi. Jyl sońyna deıin taǵy shamamen 400 jańa jasandy ıntellekt-agentter iske qosylady dep josparlanǵan.
Aıta keteıik, Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda bilim berý salasyndaǵy JI qyzmetin zańmen retteý qajettigin atap ótti.