«Jas ǵalym» forýmy: 300-ge jýyq postdoktorant jobasyn sátti aıaqtady
ASTANA. KAZINFORM – Astanada jas ǵalymdardyń I Respýblıkalyq «Jas ǵalym» forýmy ótti. Bul týraly Ǵylym jáne joǵary bilim mınıstrligi málim etti.
Eýrazııa ulttyq ýnıversıtetinde I Respýblıkalyq «Jas ǵalymdar» forýmy ótti, oǵan Qazaqstannyń túkpir-túkpirinen 300-den astam jas ǵalymdar jınaldy.
— Forýmǵa qatysýshylar «Jas ǵalym» baǵdarlamasyn — eldiń zııatkerlik áleýetin arttyrýǵa baǵyttalǵan irgeli bastama, sondaı-aq ǵylym men tehnologııany damytýdaǵy memlekettik qoldaýdyń jarqyn úlgisiekenin, bul bastama — ǵylymdy ómirlik baǵdar etip tańdaǵan talapty jastar úshin áleýmettik lıftke aınalǵanyn atap ótti. Búgingi tańda elimizdegi zertteýshilerdiń jartysyna jýyǵy — 40 jasqa deıingi jas ǵalymdar, — delingen habarlamada.
«Jas ǵalym» granttyq baǵdarlamasy Memleket basshysynyń 2021 jylǵy Joldaýynda berilgen tapsyrmasy aıasynda Ǵylym jáne joǵary bilim mınıstrligimen júzege asyrylyp jatyr. Atalǵan baǵdarlamanyń maqsaty — postdoktorantýra ınstıtýtyn qoldaý arqyly elimizdegi jas zertteýshiler sanyn arttyryp, Qazaqstannyń ǵylymı áleýetin nyǵaıtý.
Osy jyldar ishinde konkýrstyq jolmen 688 grant bólindi.
«Jas ǵalymdar» elimizdiń 18 óńirindegi 74 ǵylymı mekemede ǵylymnyń ártúrli salasynda tabysty jumys atqaryp keledi. Ótken jyldyń sońynda 300-ge jýyq postdoktorant óz jobasyn sátti aıaqtap, taǵy júzdegeni ǵylymı izdenisterin jalǵastyrýǵa kiristi.
Baǵdarlama júzege asyrylǵan úsh jyldyń ishinde júzdegen sapaly ǵylymı eńbek jaryq kórip, doktorlyq dıssertatsııalar joǵary deńgeıde qorǵaldy. Sonymen qatar, birqatar ǵylymı jetistikter naqty óndiristik salada qoldanys taýyp, praktıkalyq mánge ıe bolǵan.
Bizdiń ǵylymı zertteýlerimiz — ıadrolyq energetıkadan bastap molekýlalyq bıologııaǵa, qurylys pen jol salasyna arnalǵan materıaldardan munaı-hımııa, ekologııa, geoaqparattyq modeldeý men aqparattyq tehnologııalarǵa deıingi keń aýqymdy baǵyttardy qamtıdy. Bul izdenisterdiń nátıjeleri Qazaqstannyń órkendeýine naqty úles qosa alatyn áleýetke ıe.
Forým qatysýshylary Qazaqstan Respýblıkasynyń Prezıdenti Qasym-Jomart Kemeluly Toqaevqa ǵylymdy jan-jaqty qoldaǵany úshin erekshe alǵys bildirdi. Bul qoldaýdyń naqty nátıjesi retinde bilim men ǵylymdy qarjylandyrýdyń qomaqty artýyn, «Ǵylym jáne tehnologııalyq saıasat týraly» zańnyń qabyldanýyn, doktorantýraǵa bólinetin grant sanynyń kóbeıýin, stıpendııa mólsheriniń ósýin, úzdik álemdik ortalyqtarda taǵylymdamadan ótý múmkindikterin, zerthanalardyń jańartylýyn, jetekshi sheteldik JOO fılıaldarynyń ashylýyn, jas ǵalymdarǵa páterlerdiń tegin berilýin jáne «Jas ǵalym» baǵdarlamasyn erekshe atap ótýge bolady. Nátıjesinde, qazirgi tańda ǵylymı zertteýlermen aınalysatyn ǵalymdardyń teń jartysyn 40 jasqa deıingi jas zertteýshiler.
— Jas ǵalymdar eń sátti ınnovatsııalar adamdardyń qajettilikterin tereń túsinýden jáne mıllıondaǵan adamdardyń ómirine jaqsy áser etý nıetinen týyndaıtynyn atap ótti. Ǵalymdardyń atom energetıkasy, jasandy ıntellekt tehnologııalary, qurylys, ekologııa, geodezııa, lıngvıstıka, arheologııa, agrarlyq ǵylymdar jáne basqa da salalarda júrgizgen zertteýleriniń nátıjeleri Qazaqstannyń damýyna úles qosyp, halyqqa qyzmet etse degen nıetterin bildirdi, — dep jazdy vedomstvo.
Ǵalymdar kez-kelgen basqa saladaǵy sııaqty ǵylymdaǵy jeńisterge tek qajymas eńbek, bilim izdeý, maqsatqa umtylý, álemge ashyq bolý jáne ony jaqsartýǵa degen joǵary umtylys arqyly qol jetkiziletinine nazar aýdardy. Forýmǵa qatysýshylar daryndy jas qazaqstandyqtardy ǵylymı zertteýlerdi ómirlik jumys retinde tańdaýǵa shaqyrdy.