Jas daryndar týraly «Dara» derekti fılmi jaryqqa shyǵady
ASTANA. KAZINFORM – Prezıdent teleradıokesheni elimizdi álemge áıgili etip júrgen jas daryndar týraly derekti fılm túsirdi. Ol Jibek Joly telearnasynda búgin saǵat 12:45-te kórsetiledi.
Prezıdent teleradıokesheni daıyndaǵan «Dara» derekti fılminde pán olımpıadalary men robototehnıka jarystarynan álemdik deńgeıde júldeger atanyp júrgen jas daryndar týraly aıtylady. Sonymen qatar Qazaqstandy tanymal etken olımpıada jáne jarys jeńimpazdarynyń ata-analary, jetekshileri jáne sarapshy-ǵalymdar suhbat beredi.
Qazaq tilindegi derekti fılmniń uzaqtyǵy – 13:23 mınýt.
Aıta keteıik, bıyl qazaqstandyq daryndy jastar álemniń túrli elinde ótken pándik olımpıadalarda 26 medal ıelenip, el abyroıyn asqaqtatty.
Eske sala ketsek, Memleket basshysy 3 qazanda barlyq deńgeıdegi máslıhat depýtattarynyń II respýblıkalyq forýmynda balalar men jasóspirimder arasynda el ishindegi shynaıy qaharmandardy nasıhattaý qajettigin basa aıtqan edi.
«Bizdiń oqýshylar matematıkadan, fızıkadan jáne basqa da pánderden ótken olımpıadalarda joǵary nátıjege qol jetkizip júr. Osyndaı talantty balalardy qoldap, olardyń ustazdaryn yntalandyrý kerek», - dedi Prezıdent.
Sondaı-aq bıyl qyrkúıekte qazaqstandyq oqýshylar robototehnıkadan úsh dúrkin álem chempıony atandy.
Qazanda Memlekettik keńesshi Erlan Qarın Prezıdent tapsyrmasyna sáıkes halyqaralyq pán olımpıadalarynyń jeńimpazdary men júldegerlerin qabyldady.