Jaryq dúnıe esigin ashýǵa asyqqan sábıler saǵatqa qaramaıdy - dáriger

ALMATY. QazAqparat - Bilim, biliktilik, meıirim, eńbek, adaldyq. Bul - medıtsına qyzmetkeriniń boıynda bar qasıet. Biraq bunyń báriniń ishinde dárigerge qajet eń negizgi qasıet – shydamdylyq. Medıtsınaǵa tek júrek qalaýymen kelgen adamdar ǵana mamandyqqa adal bolyp qalady. Mundaı pikirdi Almaty qalalyq №4 perzenthanasynyń bosandyrý bólimshesiniń akýsher-gınekolog dárigeri Indıra Kemalova aıtty, dep habarlaıdy QazAqparat tilshisi.

Indıra Kemalova medıtsınalyq kolledjdi akýsherlik mamandyǵy boıynsha bitirdi. Dárigerlik joly №4 perzenthanada patologııa bóliminiń ordınatorynan bastaldy.

«Bizdiń otbasymyzda medıtsına mamany bolmaǵan, kóptegen áriptesterim sııaqty dárigerler áýletinen shyqqanym joq. Ózim medıtsınaǵa barǵym keldi. Akýsherlik qyzmettegi sııaqty keremet aýra esh jerde joq. Muny sózben jetkizý múmkin emes: qýanyshtyń kóz jasy, áıelder men balalar, qýanysh pen qaıǵyǵa ortaqtasý, adrenalın. Osynyń bári - meniń ómirimniń bir bólshegi. Men ambýlatorlyq-emhanalyq emdeý mekemelerinde jumys isteı almas edim. Meniń ornym osy jerde. Ana men balanyń janynda «, - deıdi Indıra Berikbaıqyzy.

Dárigerdiń sózinshe, ol kúnine 15-20 áıeldi bosandyryp alady.

«Bizde tótenshe jaǵdaılar bolyp turady. Men kúnine 15-20 áıeldi bosandyryp alam. Odan bólek 3-4 operatsııa jasaımyn. Alǵashqy kesar tiligi operatsııasy esimde, ol 2011 jyly boldy. Men ota jasaý bólmesinen túsiniksiz sezimmen shyqtym – emotsııany aıtyp jetkize almaımyn. Óte jaqsy mektepten óttim. Ýzaq ýaqyt tájirıbe jınaqtadym. Bul - óte mańyzdy»,-deıdi dáriger.

Aıtýynsha, akýsher-gınekolog mamandyǵy qatelikti keshirmeıdi.

«Sebebi - bir emes, eki adamnyń ómirine jaýapty bolamyz. Jumys qaýyrt. Jaryq dúnıe esigin ashýǵa asyqqan sábıler saǵatqa qaramaıdy. Akýsherlik jumystyń qıyndyǵy kóp-aq. Óıtkeni, munda ana men balanyń ómiri jatyr. Ár mınýt sanaýly. Jumys ýaqyty aıaqtaldy deý dáriger úshin sharttylyq qana. Sebebi, naýqastardyń jaǵdaıyn aýyq-aýyq surap, únemi baılanysta bolý kerek»,- deıdi keıipkerimiz.

Indıra Kemalova uzaq ýaqyt boıy sábı súıe almaı júrgen otbasylardyń kishkentaıly bolǵanyn kórý - úlken baqyt ekenin aıtady.

Jyldar boıy balasyz júrgen otbasylardyń kishkentaıly bolǵan kezdegi qýanyshyna kýá bolý - erekshe sezim. Júregińdi eljiretedi. Ómirde tekke júrmegenińdi túsinesiń. Keıde kópshilik oryndarda, kóshede kórip, tanyp qalǵan ata-analar kelip alǵysyn aıtyp jatady»,- deıdi maman.

Perzenthanada eńbek etý dárigerden akýsherııa, reanımatologııa jáne neonatologııa salasynda tereń bilimdi, kásibılikti, úılesimdi jumysty talap etedi.

«Bilim, biliktilik, meıirim, eńbek, adaldyq. Bul - medıtsına qyzmetkeriniń boıynda bar qasıet. Biraq bunyń bárinen buryn dárigerge qajet eń negizgi qasıet – shydamdylyq. Kásibı biliktilikti jetildirip otyrý qajet»,- deıdi ol.

14 jyl akýsherlik tájirıbe kezinde Indıra Kemalova joǵary biliktilik sanatyn aldy, qosymsha oqydy jáne ýltradybystyq zertteý júrgizedi.