Jarty ǵasyrdan astam ýaqyt boıy bir ujymda eńbek etý — zor baqyt — dáriger
ORAL. KAZINFORM — Batys Qazaqstan oblysynda densaýlyq saqtaý salasynda esimi qurmetpen atalatyn dárigerler az emes. Sonyń biri – Qazaqstan densaýlyq saqtaý isiniń úzdigi, «Jaıyq Dent» stomatologııa ortalyǵy» JShS dırektory Merýert Mýsına Halyqaralyq áıelder kúnine oraı Kazinform tilshisiniń saýaldaryna jaýap berdi.
—Merýert Muqanqyzy, dáriger bolýdy kishkentaıyńyzdan armandadyńyz ba, densaýlyq saqtaý salasyna qalaı keldińiz?
—Iá, dáriger bolamyn dep men mektepte oqyp júrgende-aq armandap edim. Ol kezde biz Reseıdiń Samara oblysynda turdyq. Ata-anam sol balaýsa armanymdy qoldap, maǵan sengenderi de bolar, mektepti támamdaǵannan keıin Almatyǵa jiberdi. 1970 jyly Almaty memlekettik medıtsınalyq ınstıtýtynyń (qazirgi S. J. Asfendııarov atyndaǵy Qazaq ulttyq medıtsına ýnıversıteti) stomatologııa fakýltetin bitirgennen keıin Oral qalasynda jumysqa kiristim. Sol kezden beri Jaıyq óńirinde stomatologııa salasynda eńbek etip kelemin. Bıyl 54 jyl tolmaqshy. Bastapqyda Oral oblystyq stomatologııa emhanasy retinde ashylsa, keıin «Jaıyq Dent» stomatologııa ortalyǵy bolyp ózgerdi. Bir orynda taban aýdarmaı qyzmet etip, basshylyqqa deıin kóterildim. Qazir ujymymyzda 100-den astam qyzmetker bar. Osynyń ózi — bir baqyt dep oılaımyn.
Oǵan qosa jıyrma jylǵa jýyq ýaqyt boıy oblystyq densaýlyq saqtaý basqarmasynyń shtattan tys bas mamany qyzmetin de atqardym.
— Óz ómir jáne eńbek jolyńyzda ustazdaryńyz bolǵan shyǵar?
— Árıne! Instıtýtta oqyp júrgende dáris bergen ustazdarymdy esh umytqan emespin. Dúnıeden ozǵandaryn qurmet tutamyn, kózi tirilerimen árdaıym baılanys ustaımyn. Sonymen qatar stomatologııa emhanasynda bastapqy kezde ózimnen jasy úlken áriptesterimdi ustaz dep tanydym. Olardan úırengenim kóp. Bári esimde. Eger ómirde qandaı da bir bıikterge jetip, asýlardan ótsem, ata-anamnyń, ustazdarymnyń arqasy dep bilemin.
— Uzaq jyldar boıy ujym basqarý ońaı emes, osy oraıda tájirıbeli basshy retinde áriptesterińiz jóninde ne aıtar edińiz?
— Ujym basqarý úlken eńbekti, biliktilikti qajet etedi. Ujymymdy men árdaıym ózimniń súıenishim, tiregim dep baǵalaımyn. Maqtanyshym desem de, artyq aıtqandyq emes. Qazirgi kezeńde óte bilimdi, tájirıbeli qyzmetkerlerimiz kelgen patsıentterge nemquraıly qaramaı, densaýlyqtaryn saqtaýy úshin sapaly qyzmet etip keledi.
— Adam janynyń arashashysy bolý ońaı emes. Dárigerler óz mindetin adal atqarý úshin ne qajet dep oılaısyz?
— Ár dáriger, árbir medıtsına qyzmetkeriniń basty mindeti — aldyna kelgen adamǵa kómek kórsetý, Gıppokrat antyna adal bolý. Oǵan qosa jaratýshy Allamyz bergen densaýlyqty saqtaý joldaryn qarapaıym halyqqa jetkize bilýimiz kerek. Osyny men ózim medıtsına qyzmetkerleriniń eń basty, manyzdy mindeti, mıssııasy dep túsinemin.
— Ár adam úshin tisti kútip ustaý asa mańyzdy. Bul týrasynda qandaı keńes berer edińiz?
— Tistiń bútindigin saqtaý úshin dárigerlerge jylyna eki ret qaralý kerek. Tistiń aýrýyn asqyndyrmaı, der kezinde emdetken mańyzdy.
Sondaı-aq aýyz qýysynyń gıgıenasyn saqtaý qajet. Muny da halyqqa túsindirgenniń esh artyqtyǵy joq. Sebebi tek aýyz qýysynyń gıgıenasyn saqtaý arqyly tisti bútin ustaýǵa bolady.
Jalpy, aýyz qýysynyń saýlyǵy adamnyń jalpy densaýlyǵyna áser etedi. Eger ár adam óz densaýlyǵyna kóńil bólse, ómir súrý jaǵdaıy da jaqsarar edi.
— Sońǵy saýal, óz otbasyńyzda jolyńyzdy qýǵandar bar ma?
— Otbasym týraly aıtsam, qyzym Lázzat ekonomıst, bizdiń mekemede atqarýshy dırektor bolyp qyzmet etedi. Ulym Amantaı — ózimniń áriptesim. Astana qalasynda jumys isteıdi. Allaǵa shúkir, nemerelerim bar. Qysqasha aıtqanda, osy.
Sóz sońynda barsha názik jandy zamandastarymdy, apa-sińlilerimdi tól meıramdarymen quttyqtap, baqytty bolýlaryna tilektestigimdi bildiremin. Alda kele jatqan qasıetti oraza aıynda tilegen duǵa-tilekterimiz qabyl bolsyn!
— Áńgimeńizge rahmet. Merekeńiz qutty bolsyn!
Aıta keteıik, Merýert Mýsına 1985 jyly «KSRO densaýlyq saqtaý isiniń úzdigi» atansa, 1998 jyly «Qazaqstan Respýblıkasy densaýlyq saqtaý isiniń úzdigine», 2012 jyly «Densaýlyq saqtaý isine qosqan úlesi úshin» tósbelgisimen marapattalǵan. «Qazaqstan Táýelsizdigine 30 jyl», «Eńbek ardageri» medaliniń ıegeri. Búkilálemdik stomatologtar qaýymdastyǵymen esimi «Qazaqstan stomatologııasy altyn qoryna» engizilgen.
