«Jarnamasy kóp jalǵanda abaısyzda aldanba» - baspasózge sholý
***
«Qazaqstandyqtardyń 42 paıyzy dári-dármekti jarnamaǵa senip satyp alady eken. Alaıda, statıstıkaǵa súıensek, ǵalamtor arqyly ótkiziletin dárilik zattardyń 50 paıyzynyń sapalyq rastaýy joq. Al jalǵan dári-dármek kóbeıgen qazirgideı zamanda mundaı kórsetkish ult densaýlyǵy úshin asa qaýipti. Densaýlyq saqtaý mınıstrligi osylaı dep dabyl qaǵýda», - dep jazady « Egemen Qazastan » gazeti. Densaýlyq saqtaý mınıstri Salıdat Qaıyrbekova keltirgen málimetterge sáıkes, elimizdegi árbir ekinshi qazaqstandyq dárilik zattardy dárigerdiń taǵaıyndaýynsyz-aq qabyldaı beredi eken. Sondaı-aq, árbir ekinshi qazaqstandyq dárigerdiń keńesinsiz antıbıotıkterdi qabyldap júrgen kórinedi. «Tájirıbe kórsetip otyrǵandaı, bizde kóbine tanymal brendterdiń ónimderin qoldan jasaıdy. Naqtyraq aıtsaq, «Sanofı», «Polfarm», «Prizer», taǵy basqalar. Bul kompanııalardyń ataýlaryna qulaǵymyz úırengen. Bular álemdik brend bolyp tabylady. Bizde jalǵan jáne kontrafaktilik ónimderdi baqylaýdyń memlekettik júıesi jumys jasaıdy. Alaıda, bizge tekseris júrgizý kerek. Osy tur¬ǵy¬dan alǵanda bizge halyqtyń kómegi kerek», - dedi S.Qaıyrbekova. Maqala « Jarnamasy kóp jalǵanda abaısyzda aldanba » degen taqyryppen berilgen.
Áý basta irgetasyn san ulttyń ókilderi bilek pen tilek biriktire qalaǵan Aqtaý - dostyqtyń qalasy. Mańǵystaý oblysyndaǵy ózge ult ókilderi negizinen osy qalaǵa shoǵyrlanǵan, al aýdandar men Jańaózen qalasynda turatyndar - el men jer ıesi - qazaqtar. Dostyq teńizi atalatyn Kaspıı jaǵasyndaǵy sulý qalada tatý-tátti tirlik keship jatqan birneshe ult urpaqtary Mańǵystaý oblysy Qazaqstan halqy Assambleıasynyń 18-shi sessııasynda basqosyp, keleli isterdi talqyǵa saldy. Bul jaıynda « Egemen Qazaqstan » gazetiniń senbilik sanyndaǵy « Birlikti ustanym etken utylmaıdy » degen taqyryptaǵy maqalada baıandalǵan. Basylymnyń jazýynsha, Mańǵystaý óńirinde 20 ulttyq mádenı ortalyq qurylǵan. Olar dostyqty nyǵaıtýǵa jáne óz ana tili men tarıhyn, dástúrin nasıhattaýda belsendi jumys istep keledi. Sessııada «Býlgar» tatar etnomádenı birlestiginiń múshesi N. Rafıkova, T.Shevchenko atyndaǵy ýkraın etnomádenı birlestigi múshesi V.Storojýk, «Shalom» evreı etnomádenı birlestigi múshesi Z. Avsıevıch sóz sóılep, óz yqylastaryn jetkizdi.
***
Jemqorlyqpen kúresý jumystary qansha júrgizilip jatqanymen, máseleni túbegeıli sheshý ońaıǵa tıip otyrǵan joq. Sol sebepti «Nur Otan» partııasynyń 2015 - 2025 jyldarǵa arnalǵan sybaılas jemqorlyqqa qarsy is-qımyl baǵdarlamasynyń jobasy daıyndalyp otyr. Bul jaıynda « Aıqyn » gazeti búgingi nómirindegi « Jemqorlyqtyń biri ushy tenderlerde » degen taqyryptaǵy maqalasynda tarqata jazǵan. Atalǵan qujatta azamattyq qoǵamdy, bıznes qaýymdastyǵyn jemqorlyqqa qarsy is-qımylǵa tartý, memlekettik organdardyń, korporatıvtik sektordyń qyzmetine baqylaýdy kúsheıtý, sybaılas jemqorlyqqa qarsy zańdardy jetildirý, memlekettik qyzmetterdiń sapasyna monıtorıng júrgizý, kóleńkeli ekonomıkaǵa tosqaýyl qoıý qarastyrylǵan. Sonymen qatar barlyq deńgeıde jem¬qorlyqqa qarsy daǵdy modelin qalyptastyrý qamtylǵan.
«Almatyda ótken teńizge shyǵý múmkindigi joq elderdiń BUU janyndaǵy turaqty ókilderiniń kóshpeli keńesi barysynda Kólik jáne kommýnıkatsııa mınıstrliginiń jaýapty hatshysy Zamır Saǵynov Qazaqstan júk tranzıtinen túsetin tabysty 2 mıllıard dollarǵa jetkizýdi kózdep otyrǵanyn aıtty», - dep jazady « Aıqyn » gazeti senbilik sanyndaǵy « Zamanaýı joldardyń joqtyǵy júk aǵynyn tejep tur » degen taqyryptaǵy maqalasynda. Basylymnyń jazýynsha, Qazaqstan 2020 jylǵa qaraı tranzıttik tasymaldyń úlesin jalpy júk tasymalynyń 8 paıyzyna deıin jetkizýdi maqsat etip otyr. Bul iske asyrylǵan jaǵdaıda kóliktiń barlyq túri boıynsha júk tasymalynyń kólemi eki esege deıin ulǵaıyp, tasymaldanatyn júkterdiń jalpy salmaǵy 30 mıllıon tonnaǵa jetetin bolady. Osylaısha, Qazaqstan 2020 jylǵa qaraı tranzıtten túsetin tabystyń kólemin 2 mıllıard dollarǵa jetkizýdi kózdeýde. «Sońǵy 5 jyl ishinde elimizde kólik kommýnıkatsııasy keshenin damytýǵa 20 mıllıard 300 mıllıon AQSh dollary jumsaldy. Elimizde kúni búginge deıin 19 myń shaqyrymdyq avtokólik joldary men 1200 shaqyrym temir jol jelisi qalpyna keltirildi. 9 áýejaı qaıta jabdyqtaldy. Eýroodaq elderine ushýǵa qatysty «Eır Astana» kompanııasyna salynǵan shekteýler alynyp tastaldy. Qazaqstannyń 2010 - 2014 jyldarǵa ar¬nalǵan kóliktik ınfraqurylymdardy damytý baǵdarlamasy oıdaǵydaı júzege asyryldy. Endi bıyl osy salada jańa memlekettik baǵdarlama qabyldandy», - dedi Zamır Saǵynov.
