Jarııa tyńdaý: Elordada 2025 jyly jylý tarıfi ózgere me
ASTANA. KAZINFORM – Elordada jylý tarıfi ózgerýi múmkin. Qalany jylýmen qamtamasyz etetin «Astana — Teplotranzıt» AQ ókili Almaty aýdany ákimdiginde ótken jarııa tyńdaýda osy mazmundaǵy usynysyn baıandady. Bul ótinimdi qala turǵyndary qyzý talqyǵa saldy.
Jarııa tyńdaýǵa qala turǵyndary, Astana qalasy boıynsha Tabıǵı monopolııalardy retteý komıteti departamentiniń basshysy Qanat Qulnazarov, Astana qalasy máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty negizde jumys isteıtin turaqty komıssııasynyń tóraǵasy Kendebaı Adambek, Qoǵamdyq keńes múshesi Marat Mýstafın jáne BAQ ókilderi qatysty.
Jıynda «Astana — Teplotranzıt» AQ Basqarma tóraǵasynyń ekonomıka jáne qarjy jónindegi orynbasary Serik Amangeldınov kópshilikke jańa tarıf jobasyn tanystyrdy.
«Elordadaǵy jylý jelileriniń uzyndyǵy — 1083 km. Qyzmet kórsetýde 14 sorǵy stantsııasy bar. Jylý jelileriniń fızıkalyq tozýy 54,4 paıyzdy quraıdy. 2024 jylǵa jylý energııasyn berýge bekitilgen bul tarıf respýblıka boıynsha eń tómeni sanalady. Ol bir gıgakalorııaǵa 1515,1 teńgeni quraıdy. Tabıǵı monopolııalar týraly QR zańynyń 22-babyn basshylyqqa ala otyryp «Astana — Teplotranzıt» AQ 2025 jylǵy tarıfti qaıta qaraý týraly ótinim daıyndady», - dedi ol.
Kompanııa keltirgen derekterge saı, búginde Qaraǵandyda bir gıgakalorııa 4636,29 teńge, Almatyda 4457,82 teńge, Petropavlda 3529,38 teńge, Pavlodarda 3446,66 teńge, Semeıde 2075,47 teńge turady. Astana osy bes qaladan keıin altynshy orynda tur.
Serik Amangeldınov jańa tarıf boıynsha elordada jylý qanshalyqty qymbattaýy yqtımal ekenin aıtty.
«Jańa tarıf jobasyna saı, bas qalada bir gıgakalorııa 2198,98 teńgege baǵalanǵan. ıAǵnı, ósim bir gıgakalorııaǵa — 684 teńge nemese qoldanystaǵy tarıfke qaraǵanda 45,1 paıyz joǵary», - dedi ol.
Onyń aıtýynsha, 2025 jylǵa arnalǵan ınvestıtsııalyq baǵdarlama jobasynda qarjyny 2 mlrd 228 mln teńgege ulǵaıtý qarastyrylǵan. Bul jylý trassalarynyń uzyndyǵy artýymen, jobalaý qunynyń ósýimen (17 nysan jańǵyrtylady) baılanysty.
Jańa tarıf saıasatyn qalyptastyrýǵa elektr energııasy quny, ortasha jalaqy kóleminiń ósýi de óz yqpalyn tıgizgen. Odan bólek jylý jelileri uzyndyǵynyń artýyna baılanysty jylý joǵaltý kórsetkishiniń de ósetini eseptelgen.
Baıandamashy osy jáne ózge de kóptegen sebepterdi atap, jańa tarıftiń qajettiligine sendirip baqty.
Jergilikti qoǵamdastyq ókilderi óz kezeginde bul tsıfrlardyń ashyqtyǵyna kóz jetkizý úshin kompanııaǵa memlekettik aýdıt júrgizýdi usyndy.
Sondaı-aq, baıandamashynyń jylý jelileriniń jylý joǵaltýy boıynsha bergen málimetterin tekserý úshin qoǵamdyq monıtorıng júrgizý keregi aıtyldy.
Odan bólek, «Astana — Teplotranzıt» AQ salǵan jańa jylý jelilerine jumsalǵan qarjy tutynýshylardyń qaltasynan shyqpaýy keregi eskertildi.
Tipti, tarıfti kóterýdiń ornyna bul kompanııany «erkin ekonomıkalyq aımaq» dep tanyp, 12 paıyzdyq qosylǵan qun salyǵynan bosatý bastamasy kóterildi.