Jaratylystaný-matematıka pánderi boıynsha Prezıdenttik olımpıada bastaldy

ASTANA. KAZINFORM — Astana qalasynda elimizdiń 11 (12) synyp oqýshylary arasynda jaratylystaný-matematıkalyq tsıkl pánderi boıynsha HVІІІ Prezıdenttik olımpıadasy ótip jatyr, dep habarlaıdy Oqý-aǵartý mınıstrliginiń baspasóz qyzmeti.

Mınıstrlik málimetinshe, olımpıadanyń maqsaty — matematıka, fızıka, hımııa jáne bıologııa pánderinen qabiletti jáne talantty oqýshylardy anyqtaý, olardy ári qaraı zııatkerlik damytýǵa jáne kásibı baǵdarlaýǵa jaǵdaı jasaý.  Sonymen qatar, oqýshylardyń jaratylystaný-matematıkalyq pánderge qyzyǵýshylyǵyn arttyrý, teorııalyq bilimderi men praktıkalyq daǵdylaryn tereńdetý kózdelgen.

— Saıys 3 kezeńnen turady. Birinshi (óńirlik) kezeń — 2025 jylǵy 6 qazanda ótti, oǵan 3544 oqýshy qatysty. Al ekinshi irikteý kezeńine 414 oqýshy qatysyp, eki kezeńniń nátıjesinde 201 oqýshy respýblıkalyq kezeńge joldama aldy. Fınaldyq doda 17-21 qarasha aralyǵynda júredi, — dep túsindirdi vedomstvo.

Olımpıada qorytyndysy boıynsha jeńimpazdar men júldegerler QR Oqý-aǵartý mınıstrliginiń I, II jáne III dárejeli dıplomdarymen medaldarmen jáne baǵaly syılyqtarmen marapattalady.

Buǵan deıin qazaqstandyq oqýshylar Halyqaralyq olımpıadada segiz medal jeńip alǵany habarlandy.