Japonııanyń batysynda «Lan» taıfýny soǵyp, qatty jel turdy
Alty saǵat ishinde Vakaıama prefektýrasyndaǵy Natıkatsýýrda 304,0 mm, al Kıoto prefektýrasyndaǵy Aıabede 190,0 mm jaýyn-shashyn tústi. El ishindegi áýe, avtomobıl jáne temirjol baılanysy buzyldy. Osyǵan baılanysty 650-ge jýyq adam Kansaı áýejaıynda túneýge májbúr boldy. Meteorologııalyq agenttik Japonııanyń shyǵys, ortalyq jáne batys bólikterinde nóser jańbyr týraly eskertý jasady. Turǵyndardy sý tasqyny, kóshkin jáne qatty jelge baılanysty qyraǵy bolýǵa shaqyrdy. Seısenbi kúni Central Japan Railway Co. jáne West Japan Railway Co. Nagoıa men Shın-Osaka stantsııalary arasynda, sondaı-aq Shın-Osaka men Okaıama stantsııalary arasyndaǵy barlyq joǵary jyldamdyqty poıyz reısterin toqtatty. Al Japan Airlines Co. jáne All Nippon Airways Co. 560-tan astam reısti toqtatty.
Bul 50 myńnan astam jolaýshyǵa áser etti. Japon meteorologııalyq agenttiginiń habarlaýynsha, tańerteń erte qurlyqqa soqqan taıfýn Vakaıama qalasynyń mańynda soltústik-batys baǵytta qozǵalǵan. Taıfýn epıtsentrindegi atmosferalyq qysym 985 gektopaskal boldy. Bul rette jeldiń jyldamdyǵy saǵatyna 144 shaqyrymǵa deıin jetken. Taıfýn saldarynan Japonııanyń ortalyq jáne batys bóliginde 90 myńǵa jýyq úı jaryqsyz qaldy, dep habarlaıdy Reuters.
Aldaǵy 24 saǵat ishinde ortalyqtaǵy Tokaı aımaǵynda shamamen 350 mm jaýyn-shashyn túsedi dep boljanady. Bul tamyz aıyndaǵy ortasha jaýyn-shashyn mólsherinen úsh ese kóp. Meteorologııalyq agenttiktiń boljamynsha, taıfýn sársenbi kúni tańerteń Japon teńizine jetip, soltústikke qaraı jyljıdy.
