Japonııanyń ońtústik-batysynda jerasty dúmpýleri tyıylmaı tur

ASTANA. KAZINFORM – Japonııanyń meteorologııalyq qyzmetiniń málimetterinshe, 21 maýsymnan bastap, eldiń ońtústik-batysyndaǵy shaǵyn araldarda 2 myńnan astam jerasty dúmpýi sezilgen, dep habarlaıdy Kazinform menshikti tilshisi Kyodo News-ke silteme jasap. 

Tokara araldar tobyna kiretin Akýsekı men Kodakara araldarynyń 60-tan astam turǵyny evakýatsııalandy. Olar shilde aıynyń basynda 5,5 magnıtýdalyq jer silkinisinen soń araldan ketip qaldy.

Meterologııa basqarmasynyń derekteri boıynsha, seısenbi kúni tańdaǵy jaǵdaı boıynsha Tokara araldar toby aýdanynda barlyǵy 2046-dan astam jerasty dúmpýleri sezilgen, dep habarlaıdy NHK World-Japan. 

Jergilikti bılik ókilderi evakýatsııalanǵan adamdardyń úılerine qaıtýy týraly ótinishti, jıiligi 4 baldan asatyn zilzala 5 kún qatarynan qaıtalanbasa qaraýǵa ýáde berdi.

Kyodo-nyń habarlaýynsha, jıiligi 4 baldyq jer silkinisin jaıaý ketip bara jatqan adamdardyń kópshiligi sezedi.

Osyǵan deıin japon zertteýshisiniń eldiń ońtústik-batysyndaǵy eki shaǵyn aral úsh kún ishinde bir-birinen shamamen 10 santımetrge alystap ketkenin anyqtaǵany týraly jazdyq.