Japonııanyń bıleýshi partııasy 4 qazanda saılaý ótkizbek
ASTANA. KAZINFORM — Japonııanyń bıleýshi Lıberaldy-demokratııalyq partııasy 4 qazanda qyzmetten ketken premer-mınıstr Sıgerý Isıbanyń muragerin tańdaý úshin saılaý ótkizedi, dep habarlaıdy Kyodo News.
Bul týraly seısenbi kúni saılaý komıssııasy habarlady.
Saılaý naýqany 22 qyrkúıekte bastalyp, 12 kúnge sozylady.
Saılaý bastapqyda 2027 jylǵa josparlanǵan bolatyn, biraq Isıba LDP músheleriniń qysymymen otstavkaǵa ketý nıetin jarııalaǵannan keıin kóterildi.
Burynǵy syrtqy ister mınıstri Tosımıtsý Motegı saılaýǵa qatysatynyn jarııa etti. Mınıstrler kabınetiniń bas hatshysy Esımasa Haıası men burynǵy ekonomıkalyq qaýipsizdik mınıstri Sanae Takaıtı de saılaýǵa túsýge nıetti, dep habarlady partııa derekkózderi.
Negizgi máselelerge oppozıtsııalyq kúshtermen yntymaqtastyq jáne 1955 jyldan beri úzdiksiz bılikte bolǵan, biraq qarjylyq janjal kezinde sońǵy eki ulttyq saılaýda úlken shyǵynǵa ushyraǵan partııany reformalaý jatady.
Isıba 20 shildede ótken saılaýda LDP-Komeıto koalıtsııasy parlamenttiń joǵarǵy palatasyndaǵy kópshiliginen aıyrylǵan kezdegi nashar nátıje úshin jaýapkershilikti óz moınyna alyp, otstavkaǵa ketetinin aıtty.
Sıgerý Isıba úkimet basyna ótken jyldyń qazan aıynda keldi.
Aıta keteıik, buǵan deıin BAQ Isıbanyń Lıberaldy-demokratııalyq partııanyń bólinbeýi úshin qyzmetinen ketýge nıetti ekenin habarlaǵan bolatyn.