Japonııada jergilikti sheneýniktiń uly 4 adamdy óltirdi degen kúdikpen qamaldy
Kúdikti 31 jastaǵy Masanorı Aokı – Nagano prefektýrasy Nakano qalasyndaǵy qalalyq jınalystyń spıkeri Masamıchı Aokıdiń úlken uly. Polıtsııanyń habarlaýynsha, ol eki polıtsııa qyzmetkerin atyp óltirgen jáne taǵy eki adamdy pyshaqtady degen kúdikpen qamaýǵa alyndy.
Oqıǵa prefektýra astanasy Nakanonyń soltústik-shyǵysyndaǵy qalada boldy. Polıtsııaǵa jergilikti ýaqyt boıynsha saǵat 16:25 shamasynda er adamnyń áıeldi pyshaqtaǵany týraly jedel qońyraý túsken. Dalada jumys istep júrgen kýáger jergilikti ýaqyt boıynsha saǵat 16:00 shamasynda shabýyldaýshynyń kómekke shaqyrǵan áıeldi qýyp kele jatqanyn kórgen. Kamýflıaj, qalpaq, kúnnen qorǵaıtyn kózildirik jáne betperde kıgen kúdikti áıeldiń qolynan ustap, uzyndyǵy 30 santımetrdeı pyshaqty arqasyna suǵyp alǵan. Kýágerdiń aıtýynsha, qaskúnem áıel jerge qulap bara jatqanda keýdesine taǵy da pyshaq suqqan. Shabýyl jasaǵan adam ketip qalǵan soń, 72 jastaǵy kýáger 150 metrdeı jerdegi úıine júgirip, polıtsııaǵa habarlaǵan. Keıinirek polıtsııa áıeldiń qaıtys bolǵanyn habarlady. Onyń 66 jastaǵy ıÝkı Mýrakamı ekeni anyqtaldy. Sondaı-aq, 70 jastaǵy taǵy bir áıel – ıAsýko Takeýchıdiń sol mańda jaraqattanyp, keıinnen kóz jumǵany belgili boldy.
Kúdikti oqıǵa ornyna jetken polıtseılerge oq atyp, 46 jastaǵy ınspektor Ioshıkı Tama jáne 61 jastaǵy serjant Takýo Ikeýchı qaıtys boldy.
Keıin kúdikti ákesi – qalalyq jınalys spıkeriniń úıine kirip alǵan. Polıtseıler ony berilýge kóndirgen.