Japonııada jarty ǵasyr buryn ólim jazasyna kesilgen adamǵa sot úkimi qaıta qaralady

ASTANA. QazAqparat - Japonııanyń Joǵarǵy soty 1968 jyly tórt adamnan turatyn otbasyn óltirdi degen aıyppen ólim jazasyna kesilgen 87 jastaǵy Ivao Hakamadanyń isi boıynsha jańa sot talqylaýyn belgiledi. Hakamada sol kezde ólim jazasyna kesildi. Amnesty International quqyq qorǵaý uıymynyń málimetinshe, ol álemde ólim jazasyna kesilip, úkimin eń uzaq ýaqyt boıy kútken adam boldy, dep habarlaıdy QazAqparat BBC-ge silteme jasap.

Hakamada bastyǵyn, onyń áıelin jáne eki balasyn tonady jáne óltirdi degen aıyppen qamaýǵa alyndy. Olardyń deneleri 1966 jyly Tokıo mańyndaǵy soıa óńdeý zaýytynda bolǵan órtten keıin tabylǵan.

20 kúndik jaýap alýdan keıin buryn kásipqoı bokspen aınalysqan Hakamada kisi óltirgenin moıyndady.

Alaıda sot kezinde Hakamada tergeýshiler ony uryp-soǵyp, kináni moıynyna alǵyzǵanyn aıtty. Kúdiktiniń qorǵaýshylary da tergeýshiler dáleldemelerdi qoldan jasady dep otyr.

Hakamadanyń isin qaıta qaraý kezinde onyń DNQ-sy óltirýshiniń kıimindegi qan daqtarynan alynǵan derekterge sáıkes kelý-kelmeýi qaıta tekseriledi.

2014 jyly Japonııanyń aımaqtyq soty Hakamadany qamaýdan bosatyp, isti qaıta qaraýdy buıyrdy. Sýdıalar onyń kinási týraly dálelder oıdan shyǵarylǵan bolýy múmkin dep sheshti. Tokıo soty sheshimniń kúshin joıdy, biraq endi Japonııanyń Joǵarǵy soty qaıta tyńdaý týraly sheshimdi qoldady.

«Men bul kúndi 57 jyl kúttim jáne qazir keldi. Arqamnan júk túskendeı boldy», - dedi Hakamadanyń 90 jastaǵy ápkesi Hıdeko.

Degenmen, qoldanystaǵy erejelerge sáıkes, Hakamadanyń isin qaıta qaraýǵa birneshe jyl qajet bolýy múmkin. Japondyq qorǵaýshylar sot bıligin bul protsedýrany qysqartýǵa shaqyrdy.

«Biz qazir 87 jasqa kelip, 47 jyl túrmede otyrǵannan keıin fızıkalyq jáne psıhıkalyq aýrýmen aýyratyn Hakamadanyń quqyqtaryn qalpyna keltirýdi odan ári keshiktirýge jol bere almaımyz», - dedi Japonııa advokattar alqasynyń basshysy Motodzı Kobaıası.

Álemniń damyǵan demokratııalyq elderiniń ishinde ólim jazasy Japonııa men AQSh-ta ǵana joıylǵan joq.