Japonııada ózdiginen basqarylatyn júrdek poıyz alǵash ret synaldy

TOKIO. Kyodo-QazAqparat – Japonııanyń JR East temirjol kompanııasynyń qyzmetkerleri alǵash ret ózdiginen basqarylatyn júıesi bar «sınkansen» ekspresin synaqtan ótkizdi, dep habarlaıdy QazAqparat Kyodo agenttigine silteme jasap.

Sársenbi kúni tańerteń júrgizilgen synaq kezinde 12 vagony bar shapshań júretin poıyz júrgizýshisi avtomatty rejımge ótkizgen soń, qolmen qandaı da bir aralasýsyz jumys istedi. E7 serııasyndaǵy poıyz dıspetcherlik pýnkten qashyqtyqtan basqarylǵan.

Bul – Japonııada óte shapshań júretin poıyzdyń avtonomdyq jumysynyń alǵashqy synaǵy.

Túpki maqsaty mashınıstsiz júretin poıyz bolǵanymen, sársenbide ótkizilgen synaq kezinde qandaı da bir tótenshe jaǵdaıǵa ázir bolý úshin onyń ishinde birneshe júrgizýshi men qyzmetker bolǵan.

Nııgata stansasynan 5 shaqyrymǵa jýyq joldan ótip, berilgen maksımaldy jyldamdyq – saǵatyna 110 shaqyrymǵa jetken poıyz sınkansen Nııgata vokzalynda toqtady.

JR East resmı ókili avtonomdy poıyzdyń toqtaý ádisi mashınıst jumysyna «teń keletinin» aıtyp, kompanııa ony áli de jetildirý jumystaryn júrgizetinin qosyp ótti.

Japonııada temir jolda avtomatty basqarý júıeleri jerdegi jáne ótkelderi joq keıbir monorelsti joldarda engizilgen.