Japonııada ólim jazasyn jarty ǵasyrdan kóp kútken tutqyn aqtaldy
TOKIO. KAZINFORM – Japonııa soty 88 jastaǵy Ivao Hakamatany aqtady. Ol 1968 jyly bir otbasyndaǵy tórt adamdy óltirdi degen aıyppen ólim jazasyna kesilgen bolatyn. Onyń qorǵaýshylary ondaǵan jyldar boıy apellıatsııalyq shaǵym túsirip keldi, dep habarlaıdy Kyodo.
Hakamata 2014 jylǵa deıin ólim jazasyna kesilgender kamerasynda jatqan, sodan keıin ol bosatylyp, qaıta sot protsesi bastalǵan. Sot onyń kinásin rastaıtyn dáleldemelerdiń burmalanǵanyn anyqtady.
Ivao Hakamata – burynǵy kásipqoı boksshy. Sporttyq mansabyn aıaqtaǵannan keıin ol mıso (dástúrli japon dámdeýishteri) fabrıkasyna jumysqa ornalasqan. 1966 jyly 30 maýsymda onyń bastyǵynyń úıinde órt shyqqan. Hakamata órtti sóndirýge kómektesken.
Onyń aıtýynsha, sol kezde ol bastyǵynyń, áıeliniń jáne eki balasynyń pyshaqtalǵan máıitterin tapqan. Sondaı-aq, bireý úıden shamamen 200 000 ıen urlap ketken.
Er adam qamaýǵa alynyp, oǵan kisi óltirdi degen aıyp taǵyldy. 20 kúndik jaýap berý kezinde ol óz kinásin moıyndaǵan, biraq sot munyń azaptaýdan bolǵanyn aıtty. Ustalǵannan keıin bir jyldan keıin fabrıkadaǵy mys saqtaıtyn ydystardyń birinen qanǵa boıalǵan kıimder tabylǵan. Іzder qurbandardyń qan tobyna sáıkes kelgen.
Sot er adamdy ólim jazasyna kesti, ony Japonııanyń Joǵarǵy soty 1980 jyly bekitti. Osydan keıin Hakamatanyń qorǵaýshylary 2014 jylǵa deıin appelıatsııalyq shaǵym túsirdi. 2011 jyly Ivao Hakamata ólim jazasyn eń uzaq kútken adam retinde Gınnestiń rekordtar kitabyna endi.
2014 jyldyń naýryz aıynda sot isti qaıta qaraı bastaǵannan keıin Ivao Hakamata bosatyldy. Keıingi saraptama tabylǵan qanǵa malynǵan kıimderde Hakamatanyń DNQ-sy joq ekeni anyqtaldy.
2024 jyldyń mamyryndaǵy sońǵy sot otyrysynda prokýrorlar ólim jazasyn talap etýdi jalǵastyrǵan. Degenmen, sot Hakamatanyń kisi óltirgenin moıyndaýy sııaqty aıyptaý aıǵaqtarynyń burmalanǵanyn anyqtady.
