Japonııada «Nanmadol» taıfýny saldarynan eki adam qaza taýyp, 115 adam jaraqat aldy
Tabıǵı apaty saldarynan eki adam qaza taýyp, bireýi iz-túzsiz joǵalyp ketti, 100-den astam adam jaraqat aldy. Bul týraly QazAqparat Japonııanyń Kyodo aqparat agenttigine silteme jasap habarlaıdy.
Japon teńiziniń jaǵalaýynan ótkennen keıin, taıfýn seısenbi kúni tańerteń eldiń eń úlken basty araly Honsıýdiń soltústik-shyǵys aımaǵynan jetti. Meteorologııalyq agenttik nóser jaýynann zardap shekken aımaqtarda endi kúshti jel turyp, sý tasý qaýpi bar ekenin eskertti.
Kúshti jel men nóser jańbyrǵa sebepshi bolǵan maýsymdaǵy 14-shi taıfýn jeksenbi kúni Kıýsıý aralynyń ońtústik-batys aımaǵyna jetkende buryn-sońdy bolmaǵan daýyl turdy.
Mııadzakı prefektýrasynda kóshkinnen keıin taý baýraıyndaǵy qırap qalǵan úı ishinen bir er adamnyń denesi tabyldy, al aýylsharýashylyq alqaptarynda sý astynda qalǵan kólikten taǵy bir adamnyń denesi shyǵaryldy.
Prefektýra bıligi men tabıǵı apat saldaryn joıý agenttiginiń málimetinshe, Hırosımada bir adam iz-tússiz joǵalyp, keminde 115 adam jaraqat alǵan.
Kyushu Electric Power kompanııasy tańǵy 11-de 100 myńnan astam úı jaryqsyz qalǵanyn habarlaǵan.
Mııadzakı prefektýrasyndaǵy taýly aımaqta kóshkin júrip, kópir qıraǵany rastaldy, al Shıga prefektýrasynda mańyzdy mádenı qundylyq dep tanylǵan Hıkone saraıyndaǵy ǵımarattardyń bir bóligi zaqymdandy.
Seısenbide Japonııanyń meteorologııa agenttigi eldiń soltústik-shyǵysynda saǵatyna 108 shaqyrym jyldamdyqpen jel soǵady, al batysynda tolqynnyń bıiktigi 7 metrge jetetinin boljaıdy.
Sársenbi kúni Japonııanyń ortalyq jáne shyǵysynda, sonyń ishinde Tokıoda 80 mıllımetrge deıin jańbyr jaýady dep kútilýde.
Osyǵan deıin Japonııada taıfýn saldarynan sý tasyp, 200 myńǵa jýyq úı jaryqsyz qalǵanyn habarlaǵan bolatynbyz.
Foto: english.kyodonews.net