Japonııada naqty jalaqy ekinshi jyl qatarynan tómendep jatyr

TOKIO. KAZINFORM — Japonııadaǵy naqty jalaqy 2023 jyly 2,5%-ǵa tómendedi, buǵan ınflıatsııa ósimi sebep boldy. Bul rette úı sharýashylyǵynyń shyǵyndary sońǵy úsh jylda alǵash ret qysqardy, dep habarlaıdy Kyodo News.  

Bul — elde jalaqynyń 2014 jyldan beri (ol kezde 2,8%-ǵa tómendegen) eń kúrt tómendeýi boldy.

Bul jaǵdaı el premer-mınıstri Fýmıo Kısıdanyń baǵa ósiminiń ornyn óteı alatyn jalaqyny kóterý týraly birneshe ret úndeý salǵanyna qaramastan bolyp otyr.  

Japonııanyń densaýlyq saqtaý, eńbek jáne áleýmettik qamtamasyz etý mınıstrliginiń aldyn ala esebinshe, ataýly jalaqy aıyna 1,2% ósip, 329 859 ıen (2200 dollar) boldy.

Naqty jalaqynyń tómendeýi tipti iri japondyq kompanııalar aılyqty ótken jyly orta eseppen 3,99% arttyrsa da jalǵasyp jatyr. 

«Qolaıly ekonomıkalyq tsıkldiń arqasynda adamdardyń ómirin jaqsartý úshin naqty jalaqy kóterilýi kerek. Biz jalaqynyń kóterilýi aımaqtyq aýdandarǵa, shaǵyn jáne orta bızneske taralatyndaı serpin jasaýǵa tyrysamyz», — dedi Eńbek mınıstri Keıdzo Takemı.

Sondaı-aq, eldegi úı sharýashylyǵynyń ortasha shyǵyndary 2023 jyly ótken jylmen salystyrǵanda 2,6%-ǵa tómendedi, buǵan adamdar baǵanyń ósýi jaǵdaıynda bilimge, azyq-túlikke jáne turmystyq taýarlarǵa jumsalatyn shyǵyndardy qysqartýy sebep bolǵan.