Japonııada kólden adamnyń basy tabyldy

TOKIO. QazAqparat - Dúısenbi kúni Japonııanyń Hokkaıdo aralyndaǵy kólden adamnyń basy tabyldy. Osyǵan baılanysty jergilikti polıtsııa iz-túzsiz joǵalyp ketken balyqshynyń denesin izdestirip jatyr, dep habarlaıdy QazAqparat Kyodo agenttigine silteme jasap.

Polıtsııanyń habarlaýynsha, jeksenbi kúni tańerteń 54 jastaǵy Tomohıro Nısıkava Horokanaıdaǵy Shýmarına aralyna balyq aýlaýǵa ketken.

Keıinirek jergilikti qaıyq stantsııasynyń qyzmetkeri jaqyn jerde aýzynan rezeńke etik salbyrap turǵan aıýdy kórip, Nısıkavaǵa habarlaspaq bolǵan.

Alaıda, odan túk shyqpady.

Polıtsııa janýarlardy aýlaý operatsııasyn bastady. Qalalyq ákimshiliktegi derekkózdiń aıtýynsha, izdeý tobynyń bir múshesi sol kúni bir aıýdy óltirgen.

Operatsııa kezinde adamnyń basy tabyldy. Polıtsııa joǵalǵan Nısıkavanyń isin tergep jatqanyn aıtty.

Hokkaıdonyń soltústiginde ornalasqan kólden balyqshylar Japonııada sırek kezdesetin Sahalın taımenin, sondaı-aq forel men japon qııarbalyqtaryn aýlaýǵa yntyq.