Japonııada er adam poıyzda úsh jolaýshyny pyshaqtady

OSAKA. QazAqparat – Búgin Japonııanyń batysyndaǵy Osaka qalasynda poıyzda er adam úsh jolaýshyny pyshaqpen jaraqattady, dep habarlaıdy QazAqparat Kyodo agenttigine silteme jasap.

Qylmysker dereý tutqyndaldy, dep habarlady jergilikti bılik.

Stantsııa qyzmetkeri jedel kómek qyzmetine habarlasyp, pyshaqtaý oqıǵasy týraly jergilikti ýaqytpen tańǵy 10:25 shamasynda polıtsııaǵa habarlaǵan.

Boljam boıynsha, oqıǵa poıyz júrip bara jatqan kezde bolǵan.

Úsh adam zardap shekti. 20 jastaǵy er adam, 70 jastaǵy jolaýshy men 20 jastaǵy poıyz jolserigi aýrýhanaǵa jetkizildi.

Bılik ókilderi eshqaısysynda ómirine qaýip tónetindeı jaraqat joq ekenin málimdedi.

Polıtsııa oqıǵa ornynda Kazýıa Sımıdzý esimdi er adamdy tutqyndady. Keıinirek ol pyshaqtaǵanyn moıyndady.

Polıtsııa deregi boıynsha, 37 jastaǵy Sımıdzýdi stantsııada tutqyndaǵan kezde úsh pyshaǵy bolǵan.

Osaka prefektýrasyndaǵy Idzýmısano stantsııasy iri saýda ortalyǵy men aýrýhananyń janynda ornalasqan.

Osyǵan uqsas oqıǵa osy aptada Ońtústik Koreıa astanasynda da boldy.

Seýldiń ońtústik-batysyndaǵy metro stantsııasy mańynda pyshaqtalǵan adamdardyń biri oqıǵa ornynda mert boldy. Úsh adam aýrýhanaǵa jatqyzyldy.