Japonııada eki aral úsh kúnniń ishinde bir-birinen 10 santımetrge alystap ketti

ASTANA. KAZINFORM — Japon zertteýshisi eldiń ońtústik-batysyndaǵy eki shaǵyn aral úsh kún ishinde bir-birinen shamamen 10 santımetrge alystap ketkenin anyqtady. Bul týraly Kazinform agenttigi NHK World-Japan arnasyna silteme jasap habarlady.

Sońǵy aptalarda Kagosıma prefektýrasyndaǵy Tokara araldar toby mańynda seısmıkalyq belsendilik kúsheıip otyr.

Tohoký ýnıversıtetiniń Jaratylystaný ǵylymdary joǵary mektebiniń professory Ota ıÝsaký jer qyrtysynyń qozǵalysyn zertteı kele, 2 shildede bolǵan magnıtýdasy 5,6 jer silkinisinen keıin úsh kún ishinde Kodakaradzıma araly soltústik-batysqa qaraı 6 sm, al Takaradzıma araly ońtústikke qaraı 3,5 sm jyljyǵanyn anyqtaǵan.

Buǵan deıin eki aral da soltústik-shyǵys baǵytynda qozǵalyp kelgen.

Professordyń aıtýynsha, mundaı qarama-qarsy baǵyttaǵy qozǵalys alǵash ret tirkelip otyr.

Ota ıÝsaký bul yǵysýǵa jer silkinisiniń ózi sebep bolmaýy múmkin ekenin aıtty, sebebi jer silkinisiniń qýaty men epıtsentrdiń araldardan alshaqtyǵy ondaı ózgeriske ákeletindeı kúshti bolmaǵan.

Sondaı-aq professor qazirgi jaǵdaıda bul qubylys iri jer silkinisine ákele me, joq pa — ázirge naqty aıtý qıyn ekenin atap ótti.

Ol bul qubylystyń sebebin túsiný úshin ótken kezeńderdegi geodezııalyq derekterdi zerttemek.

Aıta keteıik, buǵan deıin Japonııada bir jarym apta ishinde 900-ge jýyq jer silkinisi bolǵan edi.