Japonııada egde jastaǵy halyq 30%-ǵa jaqyndady

ASTANA. KAZINFORM — Japonııadaǵy 65 jastan asqan egde jastaǵy adamdar jalpy halyq sanynyń 29,4%-yn quraıdy, bul baqylaý tarıhyndaǵy eń joǵary kórsetkish sanalady, dep jazady Sınhýa.

Bul týraly Japonııa Іshki ister jáne kommýnıkatsııalar mınıstrligi jeksenbi kúni jarııalaǵan resmı derekterde aıtyldy.

Mınıstrliktiń baǵalaýynsha, 15 qyrkúıek — «Qarttarǵa qurmet kórsetý kúnine» — sáıkes egde jastaǵy halyq sany 36,19 mıllıon adamdy qurady. Qarııalardyń jalpy halyq ishindegi úlesi 0,1 paıyzdyq tarmaqqa ósip, rekordtyq 29,4%-ǵa jetti.

Jumys kúshi týraly sholýǵa sáıkes, ótken jyly 9,3 mıllıon qart adam eńbekpen qamtylǵan, bul aldyńǵy jylmen salystyrǵanda 160 myńǵa kóp. Bul kórsetkish te rekordtyq mánge ıe.

65 jastan joǵary adamdar arasynda eńbekpen qamtý deńgeıi 25,7%-ǵa jetip, 0,5 paıyzdyq tarmaqqa ósken. Jas toptary boıynsha bólgende, 65-69 jas aralyǵyndaǵy adamdardyń eńbekpen qamtylý deńgeıi — 53,6%, 70-74 jas aralyǵyndaǵy — 35,1%, al 75 jastan asqandardyń — 12,0% boldy.

Mınıstrlik bul úrdisti eńbek resýrstarynyń jetispeýshiligimen túsindiredi. Sondaı-aq, zeınetkerlik jasyn arttyrý da áser etedi. Egde jastaǵylardyń belsendi bolý múmkindikteri keńip jatyr. Sondyqtan eńbekpen qamtylǵan qarııalar sanynyń odan ári ósýi kútilip otyr.

Budan buryn Japonııada 23 jastaǵy jigit synyptasynyń 83 jasar ájesine ǵashyq bolyp, oǵan úılenýdi josparlap otyrǵanyn jazǵanbyz.