Japonııada balalar azaıyp bara jatyr

TOKIO. QazAqparat - Japonııadaǵy balalar sany statıstıka bastalǵan 1950 jyldan bergi eń tómengi deńgeıge jetken, dep habarlaıdy QazAqparat Kıodo jańalyqtaryna silteme jasap.

1 sáýirdegi jaǵdaı boıynsha, elde 14 jasqa deıingi 14,65 mıllıon qyz ben ul bar, bul bir jyl burynǵy kórsetkishpen salystyrǵanda 250 myńǵa az. Al ondaǵy 14 jasqa deıingi kishkentaı azamattar qazir halyqtyń 11,7 paıyzyn ǵana quraıdy. Bul kórsetkish boıynsha Japonııa 40 mıllıonnan astam halqy bar 35 eldiń ishinde eń tómengi orynda tur.

«Japonııa halqy, onyń ishinde elde turaqty turatyn sheteldikter 2020 jyldyń qazanynan 2021 jyldyń qazanyna deıin 644 myń adamǵa azaıyp, 125,5 mıllıonǵa jetti. Bul protsess qart adamdardan basqa barlyq jas sanattarynda baıqaldy. 65 jastan asqan erler men áıelderdiń sany bir jylda 190 000-ǵa artyp, 36,2 mıllıonǵa jetti, bul Japonııanyń jalpy halqynyń shamamen 29%-yn quraıdy», - dep jazdy aqparat kózi.