Japonııa sońǵy býyndaǵy joıǵysh ushaǵynyń eksportyna ruqsat berdi
ASTANA. KAZINFORM — Japonııa úkimeti qorǵanys tehnıkasyn eksporttaýǵa qoıylǵan shekteýlerdi jeńildetetin qarar qabyldady, bul eldiń basqa elderge Ulybrıtanııa jáne Italııamen birlesip jasap jatqan sońǵy joıǵysh ushaǵyn jetkizýge múmkindik beredi. Bul týraly eldiń Mınıstrler kabıneti habarlady, dep jazady TASS.
Premer-mınıstr Fýmıo Kısıdo bastaǵan úkimet otyrysynda qorǵanys tehnıkasy men tehnologııasyn eksporttaý erejeleriniń jańartylǵan nusqasy bekitildi. Osy aıdyń basynda Japonııanyń bıleýshi Lıberaldyq-demokratııalyq partııasy men onyń kishi koalıtsııalyq seriktesi Komeıto partııasy zańnamaǵa sáıkes túzetýler engizý qajettiligi týraly kelisti.
Biraq eksportqa ruqsat etiletin elderdiń tizimi shekteýli. Oǵan halyqaralyq kelisimderdiń qatysýshylary — Japonııa qorǵanys tehnologııalary men jabdyqtaryn bere alatyn memleketter ǵana kiredi. Sondyqtan olardy BUU Jarǵysynyń maqsattary men prıntsıpterine sáıkes paıdalanýǵa mindettenedi. Tizimge Aýstralııa, Ulybrıtanııa, Vetnam, Germanııa, Úndistan, Indonezııa, Italııa, Malaızııa, BAÁ, AQSh, Sıngapýr, Taıland, Fılıppın, Frantsııa, Shvetsııa kiredi. Soǵys qımyldary júrip jatqan elderge eksporttalmaıdy.
2022 jyldyń jeltoqsanynda Japonııa, Italııa jáne Ulybrıtanııa 2035 jylǵa deıin daıyn bolýy kerek jańa býyn joıǵysh ushaǵyn birlesip jasaýǵa kelisti. Sáıkes baǵdarlamalar - London men Rım júzege asyrǵan Tempest jáne japondyq F-X - GCAP (Global Combat Air Program) degen atpen biriktirildi. Joba AQSh pen EO-nyń ázirlemelerine balama bolatyn joıǵysh ushaǵyn jasaýǵa baǵyttalǵan.
Jobaǵa úsh eldiń kompanııalary qatysady. 2023 jyldyń naýryz aıynda japondyq Mitsubishi Electric korporatsııasy, ıtalııalyq Leonardo kompanııasy, onyń brıtandyq enshiles kásiporny Leonardo UK jáne ıtalııalyq Elettronica altynshy býyndy joıǵysh ushaǵyn jasaý boıynsha yntymaqtastyq týraly kelisimge otyrdy.
