Japonııa reprodýktıvtiligin joımaı-aq jynys aýystyrýǵa ruqsat berdi

Japonııa Joǵarǵy soty jynys aýystyrý týraly ota jasaý aldynda  reprodýktıvtiligin joıý qajet degen talapty alyp tastap, tarıhı qaýly qabyldady. Kazinform bul týraly NHK World-Japan agenttigine silteme jasap habarlaıdy.

Týǵan kezde er bolyp tirkelgen, biraq qazir ózin áıelge teńeıtin adam otbasy isteri boıynsha sotqa júginip, hırýrgti aralastyrmaı jynys aýystyrýǵa ruqsat berýdi surady. Ol bul erejeni májbúrli túrde saqtaý onyń quqyǵy men Konstıtýtsııany buzatynyn aıtty.

Otbasylyq sot, odan keıin Joǵarǵy sot ótinishti qabyldamady. Biraq Joǵarǵy sot alqasy sársenbi kúni bul talap rasynda Konstıtýtsııany buzatynyn málim etip, isti qaıta qaraýdy tapsyrdy.

Qazirgi japon zańnamasy boıynsha, resmı qujattardaǵy adam jynysyn tek belgili bir erejelerdi saqtaǵanda ǵana ózgertýge bolady. Máselen, adamnyń týǵan kezdegi reprodýktıvti qyzmetteri bolmaýy kerek. Bul ereje adamnan hırýrgtiń aralasýyn talap etip tur.

Ekinshi dúnıejúzilik soǵys bitkennen keıin osymen on ekinshi ret zań erejesi konstıtýtsııany buzady dep tanyldy. Japonııa seımi zańdy qaıta qaraýǵa májbúr.

Japonııa - jynys aýystyrý úshin hırýrgtiń aralasýyn talap etetin 18 eldiń biri. Dúnıejúzilik densaýlyq saqtaý uıymy (DDSU) oǵan qarsy.

Argentına men Danııany qosqanda, kem degende 17 el transgenderlerge óz betimen jynysyn anyqtaýǵa múmkindik beredi.