Japonııa premer-mınıstri Aýyl sharýashylyǵy mınıstriniń kúrishke qatysty sózi úshin keshirim surady
ASTANA. KAZINFORM – Japonııanyń aýyl sharýashylyǵy mınıstri Taký Eto óziniń kúrish satyp almaıtyny týraly aıtqannan keıin synǵa ushyrady. Ol bul ónimdi óz jaqtastarynan kóp mólsherde tegin alatynyn málimdegen, dep habarlaıdy Kazinform tilshisi Kyodo News agenttigine silteme jasap.
Bul málimdeme kúrish baǵasy kúrt qymbattaǵan tusta aıtyldy.
Mınıstrdiń bul sózi jeksenbi kúni ótken qarajat jınaý sharasynda aıtyldy. Ol kezde mınıstrlik kúrish baǵasyn turaqtandyrý maqsatynda memlekettik qordaǵy kúrishti naryqqa shyǵarý týraly sheshim qabyldaǵan bolatyn. Ótken jylmen salystyrǵanda, ónim az bolýyna baılanysty kúrish baǵasy eki ese ósip, joǵary deńgeıde qalyp otyr.
— Men kúrish satyp almaımyn, óıtkeni ony jaqtastarym molynan beredi. Úıimde sonshalyq kóp, ózim de sata alatyndaımyn, — dedi Taký Eto.
Japon úkimeti kúrish qorynyń naryqqa tek naýryzda shyǵarylǵany úshin synǵa qaldy. Aıta keteıik, baǵanyń ósýi ótken jyldyń kúzine qaraı bastalǵan edi.
Japonııa premer-mınıstri Sıgerý Isıba mınıstrdiń málimdemesin «óte orynsyz» dep atady.
— Men ony taǵaıyndaǵan adam retinde keshirim suraımyn. Bul úshin men de jaýaptymyn, — dedi ol jýrnalısterge mınıstrden túsinikteme tyńdamas buryn.
Kúrish baǵasynyń ósýi japon halqy úshin jaǵdaıdy kúrdelendirip otyr. Olar buǵan deıin de azyq-túlik pen energııa baǵasynyń qymbattaýynan zardap shegip kelgen.
Kyodo agenttiginiń demalys kúnderi júrgizgen saýalnamasyna sáıkes, respondentterdiń shamamen 87%-y úkimettiń kúrish baǵasynyń ósýine qatysty áreketterine narazy ekenin bildirgen. Sondaı-aq, Isıba kabınetin qoldaý deńgeıi onyń ótken jyldyń qazan aıynda qyzmetke kirisken kezinen bergi eń tómengi kórsetkishke tústi.
Buǵan deıin Japonııanyń kúrish tapshylyǵynyń ornyn toltyrý úshin Ońtústik Koreıadan kúrish satyp ala bastaǵany habarlanǵan edi.