Japonııa QR-dyń ıadrolyq qarýsyzdaný bastamalaryn óte joǵary baǵalaıdy - Takeo Kavamýra
Májilis spıkeri atap ótkendeı, T. Kavamýra bedeldi ári tanymal saıasatker, uzaq jyldar Japonııa Parlamentinde Qazaqstanmen dostyq lıgasyn basqaryp, qazaqstandyq-japondyq qarym-qatynasty tereńdetýge zor úles qosqan. Onyń EKSPO kórmesine arnaıy kelýi bizdiń elderimiz yntymaqtastyǵynyń joǵary deńgeıde ekendigin kórsetedi.
N. Nyǵmatýlın Qazaqstan Prezıdenti Nursultan Nazarbaev Japonııany Qazaqstannyń Tynyq Muhıt aımaǵyndaǵy mańyzdy strategııalyq áriptesi retinde baǵalaıtynyn jetkizdi.
Palata spıkeriniń aıtýynsha, Qazaqstan men Japonııanyń beıbit ómir jolyndaǵy ustanymdary ortaq. Osy rette taraptar ıadrolyq synaq máselesine qatysty pikir almasty.
N. Nyǵmatýlın bizdiń elimiz soltústik koreıanyń ıadrolyq baǵdarlamasy tóńireginde máselege nazar aýdaryp, Japon teńizine baǵyttap ushyrylǵan ballıstıkalyq zymyrandarǵa qatysty alańdaýshylyq bildirip otyrǵanyn jetkizdi.
Osyǵan oraı mártebeli meıman, Japonııada Qazaqstannyń ıadrolyq qarýdy taratpaý jónindegi bastamalaryn óte joǵary baǵalaıtynyn aıtty.
Kezdesý barysynda taraptar barlyq sala boıynsha qarym-qatynasty nyǵaıtýdyń ózekti suraqtaryn talqylady.
Takeo Kavamýra EKSPO kórmesinen alǵan áserlerimen bólisip, qazaq eliniń qonaqjaılyq qurmeti úshin alǵysyn jetkizdi.
Májilis Spıkeri meımandarǵa elimizde júrgizilgen saıası reforma jaıly baıandap, Májilis jumysynyń basym baǵyttarymen tanystyrdy.
Parlamentaralyq baılanys jaıynda kezdesý ıeleri, dostyq toptar men beıindi komıtetter arasyndaǵy is-saparlar, kezdesýler tájirıbe almasýmen qatar, ekijaqty yntymaqtastyqtyń basym baǵyttaryn zerdeleýge jol ashatynyn bildirdi.
