Japonııa qazaqstandyq azamattar úshin kelý vızasyn rásimdeýdi jeńildetpek

ASTANA. QazAqparat - Japonııa qazaqstandyq azamattar úshin kelý vızasyn rásimdeý men olardyń bolý merzimin uzartý tártibin jeńildetetini týraly málimdedi. Bul týraly QR Syrtqy ister mınıstri Qaırat Ábdirahmanov pen Japonııanyń syrtqy ister mınıstri Fýmıo Kısıdonyń kezdesýi barysynda málim boldy, dep habarlaıdy QR Úkimetiniń baspasóz qyzmeti. 

Kezdesý barysynda suhbattasýshylar QR Prezıdenti Nursultan Nazarbaevtyń 2016 jylǵy qarashada Japonııaǵa memlekettik issapary sheńberinde qol jetkizgen kelisimderdi júzege asyrý barysyn qarastyryp, sondaı-aq, ekijaqty yntymaqtastyqtyń qazirgi ahýaly men bolashaqtaǵy baǵytyn, kópjaqty formattaǵy ózara árekettesý, sonyń ishinde BUU Qaýipsizdik Keńesi jumysy aıasyndaǵy kúshterdi úılestirýdi qosa talqylady.

Qazaqstannyń Syrtqy ister mınıstrliginiń basshysy japondyq áriptesin Qazaqstannyń saýda-ekonomıkalyq, ınvestıtsııalyq, tranzıttik-kóliktik saıasatynyń basymdyqtarymen tanystyrdy.

Japonııa mınıstri ekijaqty formattaǵy ózara árekettesýdi qozǵaý kezinde QR Prezıdenti Nursultan Nazarbaevtyń «Nurly jol» memlekettik baǵdarlamasynyń, sonyń ishinde elimizdiń kóliktik-tranzıttik áleýetiniń tartymdylyǵy men onyń ózektiligin atap ótti. Astanada ótetin «EKSPO-2017» mamandandyrylǵan kórmesinde Japonııa óziniń jańa tehnologııalyq zertteýlerin usynady.