Japonııa demografııalyq daǵdaryspen qalaı kúresip jatyr

BEIJІŃ. QazAqparat - 2022 jyly Japonııa halqynyń sany 122 mln 423 038 adamdy qurap, 801 myń adamǵa azaıdy, bul 1968 jyldan beri búkil 47 prefektýrada tirkelgen halyq sanynyń el tarıhyndaǵy eń eleýli tómendeýi boldy, dep habarlaıdy QazAqparat tilshisi.

2023 jyldyń qańtar-maýsym aılary aralyǵynda Japonııada týǵan balalar sany ótken jyldyń sáıkes kezeńimen salystyrǵanda 3,6%-ǵa azaıyp, 371 052-ni qurady.

Bul derekke Japonııada týǵan sheteldikterdiń balalary da kiredi.

Japon bıligi eldegi demografııalyq úrdisti joıý úshin buryn-sońdy bolmaǵan sharalardy qolǵa alýda.

2023 jyldyń sáýirinde Japonııa premer-mınıstriniń jetekshiligimen Balalar men otbasy jónindegi jańa agenttik quryldy.

Jyldyq bıýdjeti 36 mıllıard dollardy quraıtyn jańa departament týý kórsetkishine, sondaı-aq balalarǵa zorlyq-zombylyq pen kedeıshilikke qarsy kúres máselelerimen aınalysady.

Fýmıo Kısıda basqaratyn japondyq mınıstrler kabıneti aldaǵy úsh jylda bala kútimine jumsalatyn jyl saıynǵy shyǵyndardy 2024 jyldan bastap 3,5 trıllıon ıenge (25 mıllıard dollar) arttyrýdy josparlap otyr.

Japon úkimetiniń basshysy mundaı shyǵyndardy bir balaǵa shaqqandaǵy otbasylyq járdemaqy quny boıynsha EYDU músheleri arasynda jetekshi oryn alatyn Shvetsııa deńgeıine deıin arttyrýdy josparlap otyr.

Ulttyq demografııalyq zertteýler jáne áleýmettik qamsyzdandyrý ınstıtýtynyń málimeti boıynsha, 2070 jylǵa qaraı Japonııada týý kórsetkishi 500 myńǵa deıin tómendeýi múmkin.