Japonııa bıznes federatsııasy Qazaqstanǵa óz ókildigin jiberedi

BEIJІŃ-TOKIO. QazAqparat - 12 sáýir kúni Qazaqstannyń Japonııadaǵy Elshisi  Erlan Baýdarbek-Qojataev «Keıdanren» japondyq bıznes federatsııasynyń prezıdenti Sadaıýkı Sakakıbaramen kelissózder júrgizdi, dep habarlaıdy «QazAqparat» HAA Qytaıdaǵy menshikti tilshisi.

Kezdesý barysynda Elshi quramyna 1400-den astam jetekshi kompanııalar, ónerkásiptik birlestikter jáne aımaqtyq ekonomıkalyq qaýymdastyqtar kiretin Japonııadaǵy iri iskerlik federatsııa basshylyǵyn eldegi iskerlik jáne ınvestıtsııalyq ahýaldy jaqsartý boıynsha QR Úkimetiniń negizgi jumystarymen jáne eki el kásipkerleriniń tyǵyz kooperatsııasyna arnalǵan múmkindiktermen tanystyrdy. Astanada «EKSPO-2017» halyqaralyq mamandandyrylǵan kórmesin ótkizýge Qazaqstan Elshisi erekshe nazar aýdardy.

Óz kezeginde «Toraı Indastrı» jáne «Hıtachı» syndy tanymal japondyq kompanııalardyń basshylyq quramyndaǵy Sakakıbara QR Prezıdenti Nursultan Nazarbaevtyń 2016 jyldyń qarasha aıynda Japonııaǵa barǵan resmı sapar nátıjeleriniń, ásirese «Keıdanren» quramyna enetin Japonııa iskerlik áleminiń kóshbasshylarymen júrgizgen kelissózderdiń mańyzdylyǵyn basa aıtty. Bul kezdesý eki eldiń saýda-ekonomıkalyq jáne ınvestıtsııa-tehnologııalyq seriktestigine arnalǵan jańa perspektıvalyq baǵyttardy anyqtaýǵa múmkindik bergeni atalyp ótti.

Sonymen birge, japondyq bıznes federatsııasynyń basshysy qazaqstandyq taraptyń halyqaralyq mamandandyrylǵan kórmege daıyndyq jumystaryna, Qazaqstannyń «EKSPO-2017» ınfraqurylymyn ary qaraı tıimdi paıdalaný josparlaryna joǵary baǵa berdi.