Japonııa 20-dan astam televızııalyq ónimin Qazaqstanǵa tegin usynady
Ortalyq Azııa elderimen mádenı ózara is-qımyl jónindegi japondyq mıssııa basshysynyń aıtýynsha, olar Ózbekstan, Qyrǵyzstan, Túrikmenstan, Tájikstan elderinde bolyp, sońynda Qazaqstanǵa kelgen. Elordamyzdaǵy saparlary barysynda Beıbitshilik pen kelisim saraıyna, Áziret Sultan meshitine baryp, Qazaqstannyń tarıhı jáne mádenı muralarymen keńinen tanysqan.
«Erteńnen bastap Qazaqstannyń Úkimet múshelerimen kezdesýdi josparlap otyrmyz. Atap aıtqanda, Qazaqstannyń Mádenıet jáne sport mınıstrimen, Syrtqy ister mınıstriniń orynbasarymen júzdesýimiz josparlanǵan. Kelissózder barysynda mádenıet salasyndaǵy eki eldiń yntymaqtastyǵyn damytýǵa bolatyn baǵyttardy aıqyndaımyz dep oılaımyn. Degenmen, Astanaǵa kelgennen keıin ózimizdiń keńesimizdi ótkizip, qazaq-japon arasyndaǵy dıalogty odan ary damytýǵa múmkindik beretin eki baǵytty aıqyndap aldyq», - dedi ol.
Onyń aıtýynsha, eń birinshiden, eki eldiń arasyndaǵy gýmanıtarlyq alys-beriske tyń serpin beretin qazaqstandyq sarapshylarmen jumysty jandandyrýǵa basa nazar aýdarylatyn bolady. Ekinshi baǵytta Qazaqstan men Japonııa arasyndaǵy mádenı baılanystardy kúsheıtýge mán beriledi. Munan bólek, japontanýshylardy, japon tilin úıretýshilerdi daıyndaýǵa kóńil bólinbek.
«Sonymen qatar televızııalyq kontentti usyný baǵytyndaǵy yntymaqtastyqty da jolǵa qoıýǵa bolady dep esepteımiz. Jalpy, bul ekijaqty yntymaqtastyqty damytý barysynda basa mán beretin baǵyttarymyzdyń biri. Biz 20-dan astam televızııalyq jobany qazaqstandyq tarapqa usynýdy josparlaýdamyz. Onyń ishinde televızııalyq serıaldar men derekti fılmder bar. Bul kontentterdi kórsetý quqyǵyn Japonııanyń Ortalyq Azııa elderimen mádenı ózara is-qımyl jónindegi qory satyp alǵan. Sondyqtan bul usynystarymyzǵa qazaqstandyq tarap qyzyǵýshylyq tanytatyn bolsa, onda olardy Qazaqstandaǵy Japonııa Elshiligi arqyly tegin beremiz. Sýbtıtri orys tilinde bolady. Ony jasaý jumystaryn da óz moınymyzǵa alamyz», - dedi ol.
Mıssııa basshysynyń aıtýynsha, japon tarapy da qazaqstandyq telearnalardyń ónimderin alýǵa qyzyǵýshylyq tanytady.
«Bul máseleni qazirgi ýaqytta tyńǵylyqty qarastyryp jatyrmyz. Erteń «Qazaqstan» telearnasynyń basshysy Erlan Qarınmen kezdesý barysynda talqylaıtyn bolamyz», - dedi Ando.
