Japonııa 1984 jylǵy kisi óltirý isin alǵash ret qaıta qaramaq

ASTANA. KAZINFORM — Japonııanyń Joǵarǵy soty eldiń soǵystan keıingi tarıhynda alǵash ret ómir boıyna bas bostandyǵynan aıyrý nemese ólim jazasy qarastyrylǵan bap boıynsha iske qatysty úkimdi sottalǵan adam qaıtys bolǵannan keıin qaıta qaraýǵa sanktsııa berdi, dep habarlaıdy Kyodo agenttigi.

Áńgime kisi óltirdi dep aıyptalǵan Hıromý Sakahara týraly bolyp otyr. Ol 2011 jyly, ádildikke qol jetkize almaı, ómirden ótken edi.

2000 jyly Joǵarǵy sot ony Sıga prefektýrasynyń Hıno qalasynda 69 jastaǵy sharap dúkeniniń ıesi Hatsý Ikemotony óltirip, tonady dep kiná taqqan. Sakahara óz kinásin moıyndamaı, tergeý kezinde bergen aıǵaqtary qysym kórsetý arqyly alynǵanyn málimdegen. Sot onyń ótinishterin qaıta-qaıta qanaǵattandyrmaı kelgen. Ol 75 jasynda ómir boıyna bas bostandyǵynan aıyrý jazasyn óteı júrip qaıtys boldy.

Alaıda onyń otbasy ádildik jolyndaǵy kúresti toqtatqan joq. 2018 jyly Otsý qalasynyń okrýgtik soty Sakaharanyń tergeýshilerge qylmys ornyn kórsetkeni jónindegi aıǵaqtardyń senimdiligine kúmán keltirip, isti qaıta qaraý týraly sheshim shyǵardy. Prokýratýra bul sheshimge eki ret shaǵym túsirip, protsesti taǵy jeti jylǵa sozdy. 2023 jyly Osaka Joǵarǵy soty isti qaıta qaraý jónindegi sheshimdi qoldady, alaıda prokýratýra taǵy da apellıatsııa berdi. Endi Joǵarǵy sot bul máseleni túpkilikti jaýyp, prokýratýranyń shaǵymyn qanaǵattandyrmady.

Qaıta qaraý protsesi Otsý qalasynyń okrýgtik sotynda ótedi. Sarapshylar bul sheshimdi aqtaý úkiminiń aldyndaǵy qadam retinde baǵalap otyr.

— Bul óte uzaqqa sozyldy. Mundaı jaǵdaı endi qaıtalanbaýy tıis, — dedi Sakaharanyń uly Kodzı Tokıoda ótken kezdesýde jáne protsesti tezirek bastaýdy talap etti.

Bul is Japonııadaǵy sot úkimderin qaıta qaraý júıesin reformalaý jónindegi pikirtalastar aıasynda keń rezonans týdyrdy. Qoldanystaǵy tártip uzaq ýaqyttan beri synǵa ushyrap keledi, óıtkeni ol prokýratýraǵa kinásiz adamdardy aqtaý protsesin sheksiz sozýǵa múmkindik beredi. Ádilet mınıstrligi tıisti túzetýler ázirlep jatyr, alaıda qolda bar málimetterge sáıkes, prokýratýranyń isterdi qaıta qaraýǵa qarsylyq bildirýine tyıym salý normasy reformaǵa engizilmeıdi. Sakahara isi bul ustanymdy ózgertýi múmkin.

Japonııa zańnamasy sottalǵan adam qaıtys bolǵannan keıin, eger onyń kinásiz ekenine negizdi kúmán týyndasa, qylmystyq isti qaıta qaraýǵa múmkindik beredi. Alaıda is júzinde sottar bul tetikke óte sırek júgingen. Soǵystan keıingi Japonııada mundaı alǵashqy protsess 1985 jyly kisi óltirdi dep sottalǵan áıeldi aqtaýmen aıaqtalǵan.

Aıta keteıik, Ońtústik Koreıanyń burynǵy prezıdenti ómir boıy bas bostandyǵynan aıyryldy.